अजरबैजान व आर्मिनिया दथुइ युद्ध तच्वल

एजेन्सी – अजरबैजान व आर्मिनिया दथुइ युद्ध तच्वया वःगु दु। नागोर्नो काराबाखय् जुयाच्वंगु युद्धया झ्वलय् निगुलिं पक्षय् तःधंगु गोलाबारी यानाच्वंगु दु। आर्मिनियां अजरबैजानया नागोर्नो काराबाखया मू शहर स्टेप्नाकियर्टय् निशाना दयेकाच्वनागु खँ धाःगु दु ।

एएफपीया थन लगातार विस्फोटया सः ताये दयाच्वंगु दुसा शहरया गुलिखे थासय् कुँ त्याःत्याः थहां वयाच्वंगु खनेदु। अजरबैजानया रक्षा मन्त्रालयं आर्मिनियाया सेनां स्वंगू लाख स्वयां अप्वः जनसंख्या दुगु शहर गांजाय् आक्रमण याःगु खँ धाःगु दु। भिडियो फुटेजय् नं ततःधंगु भवनय् नष्ट जुयाच्वंगु खनेदुगु दु ।

निगुलिं देशय् युद्धया झ्वलय् आमनागरिकतय्त निशाना दयेकूगु द्वपं बियाच्वंगु दु। अजरबैजानयात ग्वाहालि यानाच्वंगु टर्किं नं आर्मिनियां गांजा आमजनतायात निशाना दयेकूगु द्वपं बिउगु दु। अजरबैजानया राष्ट्रपति इल्हाम अलीयेवं राष्ट्रया नामय् संवोधन यासें युद्ध दिकेगु निंतिं छुं शर्त न्ह्यब्वःगु खः, तर थ्व शर्त धाःसा आर्मिनियां स्वीकार याःगु असम्भव धयाथें दु ।

वय्कलं आर्मिनियां कब्जा यानातःगु जमीन त्वःता वनेमाःगु थुकिया लिसें उमिसं अजरबैजानया जनतायाके माफी फ्वनेमाःगु खँ धाःगु दु। वय्कलं नागोर्नो काराबाखय् सुयातं कब्जा याके बीमखु धासें थ्व जमिन अजरबैजानया खः धयादीगु दु। वय्कलं आर्मिनियाया सेनां कब्जा यानाःगु लागां सेना लिहां वनेगु समयसीमा तोके यायेमाःगु खँ धयादीगु दु ।