जागरुक युवा समाजया हिदान ज्याझ्वः
येँ (नेपालभाषा टाइम्स) – जागरुक युवा समाजया ग्वसालय् थनया पुलां धल्कोय् स्वक्वःखुसी हिदान ज्याझ्वः जुल । कोरोना (कोभिड–१९)या महामारीया इलय् सुं नं ल्वगि हिया अभावं मृत्यु वरण यायेमालीगु स्थितिइ मथ्यनेमा धइगु ल्याखं समाजं उगु हिदान ज्याझ्वः याःगु खः ।
ब्लड डोनर्स एशोसियसन नेपाल (ब्लोदान)या आह्वानय् जूगु हिदान ज्याझ्वलय् मुक्कं २० म्हेसिनं हिदान यानादीगु खः । हिदान ज्याझ्वलय् ब्लोदानया केन्द्रीय नायः सानुबाबु प्रजापति, बागमति प्रदेश सांसद वसन्तप्रसाद मानन्धर, येँ महानगरपालिका १७ वडाअध्यक्ष नविन मानन्धर लगायतया विशिष्ट व्यक्तित्वपिनिगु उपस्थिति दुगु खः ।
कोरोना संक्रमणया कारणं आपालं मनूत छेँय् छेँय् हे च्वनाच्वंगुलिं यानाः हिदान याइपिं मदयाः हि अभाव जुयाच्वंगु अवस्थायात ध्यानय् तयाः समाजं उकथं हिदान ज्याझ्वः यानागु हिदान ज्याझ्वःया कजिलिसें समाजया लिउछ्यांजे राजीव श्रेष्ठं जानकारी बियादिल ।
विशेष यानाः बँपसः चिइकेगु अभियानय् लगे जुयाच्वंगु समाजं थुकथं हिदान ज्याझ्वःयात निरन्तरता बीगु झ्वलय् थ्व स्वयां न्ह्यः थँहिति व त्यःरय् नं हिदान ज्याझ्वः यायेधुंकूगु दु। वइगु शनिवाः इतुंबहालय् हिदान ज्याझ्वः यायेगु नं समाजं जानकारी बिउगु दु ।
थ्व हे झ्वलय् विरगंज महानगरपालिका वडा नं. २२ स्थित पशुपति अन्नपूर्ण आश्रम, जगन्नाथपुरीइ हिदान ज्याझ्वः जुल । संस्थाया ग्वसालय्न्हा पांखुसी जूगु हिदान ज्याझ्वलय् मूपाहांकथं नेपाल स्वयंसेवी रक्तदाता समाजया केन्द्रीय अध्यक्ष शतक रक्तदाता प्रेमसागर कर्माचार्य मूपाहांकथं झायादीगु खः ।
ज्याझ्वलय् वय्कलं हिदानया आवश्यकता व थुकिया मर्मबारे कुलादीगु खः । विरगंज महानगरपालिकाया प्रमुख विजयकुमार सरावगीया विशेष आतिथ्यताय् जूगु ज्याझ्वलय् पाहांकथं पतञ्जली योग विज्ञान आयुर्वेदया युवराज सुवेदी, पर्सा रक्तसंचार सेवाया प्रमुख उदयराज शर्मा, नेपाली कांग्रेसया केन्द्रीय दुजः राज महम्मद अन्सारी २२ वडाअध्यक्ष ग्यासुदिन मियाँ अन्सारीया उपस्थिति दुगु खः । ज्याझ्वलय् मुक्कं २९ म्हेसिनं हिदान यानादीगु खः ।
LEAVE YOUR COMMENTS