शुल्क कायेमते धयागु मदु : शिक्षा मन्त्री
स्कुल तुरुन्त चायेकेफइ मखु, समस्या समाधानया निंतिं मन्त्रिपरिषद्य् प्रस्ताव वनेधुंकल
येँ (नेपालभाषा टाइम्स) – निजी विद्यालयतय्सं अनलाइन कक्षाया शुक्ल कायेमखंगुलिं अनलाइन कक्षा नं बन्द यायेधुंकाः मस्तय् शिक्षायात कयाः अभिभावकतय्सं चिन्ता प्वंकाच्वंगु इलय् शिक्षामन्त्री गिरिराजमणि पाखेरेलं सरकारं अनलाइन कक्षाया शुल्क कायेमते धयागु मदु धयादीगु दु ।
बिबिसीलिसे खँ ल्हासें मन्त्री पोखरेलं सरकारं शुक्ल कायमते धयागु मदु, तर थुकिया बारे स्कुल, अभिभावक व स्थानीय सरकारं हे निर्णय यायेमाःगु खँ धयादीगु दु। मन्त्री पोखरेलं शुल्क कायेमते धयागु मदु धाःसां मन्त्रालयं धाःसां तःक्वः हे वक्तव्य पितबियाः अनलाइन कक्षाया नामय् शुल्क म्हये दइमखु धकाः निर्देशन बिउगु खः । थुकियात कयाः वय्कलं धयादीगु दु, ‘दछियंकंया शुल्क कायेगु धकाः वक्तव्य पिकायेग व स्कुल नं चायेकेगु घोषणा याःगुलिं उगु संस्थातय्सं थःपिनिगु भूमिकायात आःया परिस्थितिलिसे स्वाकाः ठीक ढंगं बुझे मजूगुलिं वक्तव्य पिकायेमाःगु खः ।’
‘छेँ बालं कयाः संचालन यानाच्वंगु स्कूलतय्त झन मछिंगु अवस्था दु। शिक्षक व कर्मचारीतय् समस्या नं दु। उकिं शुक्ल हे कायेमते धकाः जिमिसं धयागु मदु, तर छुकिया कायेगु छुकिया मकायेगु धयागु विषयय् जक थ्व खँ स्वानाच्वंगु दु। व्यावहारिक समस्यायात दुवालाः स्वयाच्वनागु दु’ वय्कलं धयादीगु दु ।
मन्त्री पोखरेलं समस्या समाधानया निंतिं मन्त्रिपरिषद्य् अन्तिम प्रस्ताव यंकागु व थुकिं हे समस्या समाधान याइगु खँ धयादीगु दु। समस्या समाधानया निंतिं वंगु बिहिवाः मन्त्री नापलाःपिं विद्यालय संगठनया पदाधिकारीतय्सं नं याकनं समस्या समाधान जुइगु आशा प्वंकूगु दु। तर उमिसं स्थानीय सरकार, अभिभावक व विद्यालयं निर्णय यानाः शुल्क म्हयेगु धयागु खँय् धाःसा थःपिंत विश्वास मदुगु खँ नं धाःगु दु। प्याब्सनया महासचिव कुमार घिमिरें गुलिखे स्थानीय तहं कारवाही हे याये धकाः सुचं पिकाःगु व विद्यार्थी संगठनतय्सं नं विरोध यानाच्वंगु धासें स्थानीय तहलिसे सहलह यानाः शुल्क म्हयेगु धयागु खँय् थःपिंत विश्वास मदुगु खँ धयादीगु दु ।
थ्व हे दथुइ शिक्षामन्त्री पोखरेलं स्कुल धाःसा तुरुन्त चायेकेफइगु अवस्था मदुनिगु खँ नं धयादीगु दु। ‘साउन ७ गते तक तयातःगु लकडाउन लिपा मन्त्रिपरिषदं स्कुल चायेकेगु बारे थप निर्णय यायेफु, तर तुरुन्त हे भौतिक रुपं स्कूल चायेकेगु अवस्था धाःसा मदुनि’ वय्कलं धयादीगु दु ।
वय्कलं विद्यालय हाकनं चायेकेगु निंतिं सरकारं कार्यविधि दयेकाच्वंगु व साउन ७ गते दुने हे थुकियात न्ह्यःने न्ह्याकेगु खँ नं धयादीगु दु। वय्कलं महामारीया दथुइ शैक्षिक सत्र मस्यनेमा व विद्यार्थीतय् पढाइलय् छुं लिच्वः मलायेमा धकाः सरकारं याकनं हे स्पष्ट खाका हयेत्यंगु खँ नं धयादीगु दु। वय्कलं सरकारं पहिचान याःगु प्यताजिया वैकल्पिक सिकाइ माध्यमयात हे न्ह्यःने न्ह्याकेगु व आवश्यक तयारी लिपा जक स्कुल चायेकेगु तयारी जुयाच्वंगु जानकारी नं बियादीगु दु ।
LEAVE YOUR COMMENTS