कोरोनाया कारणं भुटानय् सुर्तीजन्य पदार्थया प्रतिबन्ध चीकल

एजेन्सी- भुटानं सुर्तीजन्य पदार्थय् तयातःगु प्रतिबन्धयात फुकुवा याःगु दु । भुटानी सरकारं कोरोना महामारीया हुनिं थज्याःगु असमान्य निर्णय यायेमाःगु खँ धाःगु दु । प्रतिबन्ध फुकुवा लिपा सरकारी ड्युटी-फी पसलय् सुर्तीजन्य पदार्थ न्यायेदइगु जूगु दु ।

भुटानय् सुर्तीजन्य पदार्थ छ्यलेगुयात पाप यायेगु कथं कायेगु यानातःगु दु । सन् २०१०स सुर्तीजन्य पदार्थ उत्पादन यायेगु, मीगु व वितरण यायेत प्रतिबन्ध तःगु खः । तर विदेशं अप्व कर पुलाः छुं मात्राय् निर्यात यायेत सरकारं छुट बियातःगु खः । तर कोरोना भाइरसया महामारी लिपा भारत व भुटान दथुइ सीमा बन्द जुइवं अन सुलासुला सुर्तीजन्य पदार्थ हयेगु ज्या जुयाच्वंगु खः । थ्वहे कथं अगस्त १२य् भारतं सुर्तीजन्य पदार्थ ज्वना भुटानय् वःम्ह मनूयात कोरोना भाइरस संक्रमण खनेदयेवं सरकारं प्रतिबन्ध चीकेगु निर्णय याःगु खः ।

सरकारं अवैधरुपं जुयाच्वंगु व्यापार व सीमा वारपार जुया अप्वयेफुगु संक्रमण नियन्त्रण यायेगु निंतिं थज्याःगु पलाः ल्ह्वनेमाःगु खँ धाःगु दु । सरकारं प्रतिबन्धया फुकुव छुं ईया निंतिं जक जूगु खँ धाःगु दु ।

७ लख ५० हजार जनसंख्या दुगु भुटानय् आः तक १ सय ९५ म्हेसित कोरोना संक्रमित जुइधुंकूगु दु ।