मंगल ग्रह : थौंकन्हय् छाय् तग्वः व जल्लथीगु खनाच्वंगु

एजेन्सी – चान्हय् पिहां वयाः आकाशय् स्वयादिसँ सा । पृथ्वी लिसेलिसें सूर्यया छखेपाखे खनेदुगु मंगल ग्रह थौंकन्हय् दकलय् तःधं व त्वाल्ल थिनाच्वंगु खनेदइ । हरेक २६ महिनाय् पृथ्वी व मंगल ग्रहया ज्वः थःथवय् दकलय् सतिक लाःवइ, अले हाकनं थःथःगु हे कक्षय् चाःहिलाः तापाना वनी ।

मंगलवाः चान्हय् थ्व खास क्षण वयेत्यंगु दु,गुकियात खगोलशास्त्रीतय्सं ‘अपोजिसन’ अर्थात् आमनेसामने धकाः धाइ । थ्व स्वंगुलिं ग्रह जीएमटी ई २३ः२० य् छध्वलय् हे लाःवइ । ‘तर थ्व स्वयेत चान्हय् थ्यंक पियाच्वनेमाः धयागु मदु। बहनी हे आकाशय् खनेदइ । छि झुक्के नं जुइमखु, सर्गतय्त सकं थिनाच्वंगु तारा थेंज्याःगु वस्तु खनेदइ’ खगोल फोटोग्राफर ड्यामियन पीचं बिबिसींयात धाल, ‘आकाशय् खनेदइगु थ्व थिनाच्वंगु तारा थेंज्याःगु ग्रह याउँक हे खनेदइ ।’

थ्व वालय् छगू तप्यंगु ध्वलय् पृथ्वी मंगल ग्रह आमने सामने खनेदइगु जूसां वंगु वाःया मंगलवाः मंगल व पृथ्वी २६ महिना लिपा दकलय् सतिक लाःवःगु खः । थुपिं आः ६२ करोड ६९लाख ५७० किलोमिटर दूरीइ दु। सन् २०३५ तक दकलय् म्हो दूरी थ्व हे जुइ । थ्व स्वयां न्ह्यः सन् २०१८ य् आमनसामने जूबलय् पृथ्वी व मंगल ग्रह मुक्कं ५८ करोड किलोमिटरया दूरीइ लाःवःगु खः ।

तर खगोल फोटोग्राफरतय् निंतिं थ्व पालय्या मंगल ग्रहया दृश्य विशेष जुइ, छाय्धाःसां थ्व अवस्थितिया उचाइ फोटो कायेगु निंतिं उपयुक्त दु। ड्यामियन थेंज्याःगु अनुभवी फोटोग्राफरतय्सं ‘लक्की इमेजिङ्ग’ धयागु प्रविधि छ्यलाः बांलाःगु तस्बिर कायेफइ । उमिसं छक्वलं तःपाः किपा काइ, अले सफ्टवेयर छ्यलाः दकलय् बांलाःगु तस्बिर पिकाइ ।

ड्यामिनया कयातःगु छपाः किपाय् मंगल ग्रहया सतह खनेदु, थ्व मध्य अन पहाड व समथर मैदान नं खनेदु। दक्षिण व उत्तरी ध्रुर्वया फरक नं बांलाक खनेदु। दक्षिणी धु्रवया कार्बन डाइअक्साइडया च्वापुया द्वँ नं प्रस्ट रुपं खनेदु। थ्व तस्बिर १४ इञ्च सेलेस्ट्रोन टेलिस्कोप छ्यलाः कयातःगु खः ।

‘थ्व विशेष उपकरण खः’ ड्यामिनं धाल, ‘तर थ्व स्वयां बछि जक क्षमता दुगु टेलिस्कोपं नं मंगलया विवरणत खनेदइ ।’

पृथ्वी व मंगल आमनसमने जुइ ई लाकाः थीथी देशं पृथ्वीपाखें मंगलग्रहपाखे अन्तरिक्ष यानत छ्वयेगु याइ । आः नं थज्याःगु स्वंगः यान मंगलग्रहपाखे छ्वयातःगु दु। थ्व फुक्कं यानाः जुलाई महिनाय् छ्वःगु खः । न्हापांगु युनाइटेड अरब इमिरेट्सया होप अर्बिटर, चीनया तियानवेन अर्बिटर व रोबर अले अमेरिकाया पर्सिभरेन्स रोब खः ।

युरोप व रुसं नं यान छ्वयेगु योजना दयेकूगु खः, तर उमिसं इलय् हे यान छ्वयेमफुत । उकिं आः सन् २०२२ तक उमिसं पीमालीगु जुइ । होप तियानवेन व पर्सिभेरेन्स फ्रेबु्रअरी महिनाय् मंगलय् थ्यंकेगु योजना दु। सन् २००३ य् मंगल पृथ्वीया दकलय् सतिक थ्यंकःवःगु खः । उबलय् पृथ्वी व मंगल ग्रह दथुया दूरी मुक्कं ५६ करोड किलोमिटर जक दुगु खः । आमने सामने जुइबलय् थ्व निगः ग्रहया दूरी १०० करोड किलोमिटर तक नं जुइ, गुगु सन् २०१२ य् जूगु खः । थ्व निगू ग्रहया दूरीया फरकपन थ्व निगू ग्रहं चाःहिलीगु अण्डाकार कक्षया आधार जुइ ।

सम्बन्धित बुखँ

LEAVE YOUR COMMENTS