कामवासनाया व्यवस्थापन

सत्वप्राणिपिं उत्पन्न जुइगु धयागु कामवासना पाखें खः । उकिं प्राणिपिंके कामवासनाया भाव दयाच्वनी गुबले तक उपिं क्लेशविहीन जुइमखु । भगवान बुद्धं धयाबिज्याःगु दु कि संसारय् जिं अज्याःगु रुप खना गुगु रुपं पुरुषयागु चित्तयात उथुलपुथुल यानाबी, उगु रुप प्रतिया आसक्तिं मन विक्षिप्त यानाबी ।

व गुगु रुप खः ले ? धयागु न्ह्यसःया लिसः खः– मिसाया रुप । मिसाया रुप प्रति मिजं आकर्षित जुयाच्वनी, चित्त विक्षिप्त यानाच्वनी, असन्तुलित जुयाः ज्यूगु–मज्यूगु ज्या यानाच्वनी । अथेहे भगवान बुद्धं हाकनं धयाबिज्यागु खः जिं अज्याःगु रुप नं खना गुगु रुपं छम्ह मिसायात विक्षिप्त याइ, वयागु चित्तयात उथुल पुथुल याइ ।

व गुगु रुप खः ले ? धयागु न्ह्यसलय् वसपोलया लिसः खः– मिजंया रुप । मिजंया रुपय् आसक्त जुयाः नं मिसापिंसं न्ह्यागु नं यायेत तयार जुयाच्वनी । थुकथं छम्ह मिजंया लागि मिसा व छम्ह मिसाया लागि मिजं परस्पर आकर्षणया विषय जुयाच्वनी । छम्हं मेम्हयागु रुप, शब्द, गन्ध, रस, स्पर्श व कल्पनाय् भुले जुयाः विभिन्न कथंया समाजयात मनिंगु ज्या यानाच्वनी व समस्याया सम्बद्र्धन यानाच्वनी ।

उमि दथुइ उत्पन्न जुइगु आकर्षण धयागु कामवासना हे खः, उकिया कारणं छखे संसार न्ह्याः वनाच्वनीसा मेखें दुःखया चक्र नं ल्यू ल्यू वयाच्वनी ।

कामवासना पाखें अलग मजूतले दुःखं मुक्त जुइ मखु
भगवान बुद्धं कनाबिज्याःगु चतुआर्यसत्य कथं संसार दुःखया खानी खः, उकिया कारण तृष्णा खः । काम धयागु नं तृष्णाया छगू प्रकार जूगुलिं दुःख पाखें पूर्णत छुटकारा जुइगु खःसा उकिं तापानाः ब्रम्हचर्या पाखे उन्मुख जुइमाःगु वसपोलया वचन खः । कामया दोषयात वर्णन यानाबिज्यासें भगवान बुद्धं धयाबिज्याःगु दु –

कामतो जायती सोकं कामतो जायती भयं कामतो विप्पमुत्तस्स नत्थि सोको कुतो भयं
अर्थात कामया कारणं शोक उत्पन्न जुइ, कामया कारणं भय उत्पन्न जुइ, कामपाखें तापाःम्ह मनूतय्त शोक उत्पन्न जुइमखु व भय उत्पन्न जुइगु कारण दइमखु ।

थुगु विषययात थुइके कथं वसपोलं धयाबिज्याःगु दु कि काम धयागु क्वें वांन्याना वां हि वयेकाच्वंम्ह खिचां थःगु हियात हे रस भाःपीगु थें खः । थुकथं कामया निस्सारता व थुकिया वास्तविक रुपया बारे कनाबिज्यासें वसपोलं क्लेशयात सम्बद्र्धन यानाः दुःखमय यानाबीगु कारणं कामया सेवन त्याज्य धयाबिज्याःगु खः ।

तर थथे धकाः कामवासनायात दमन यानाः मेपिनि न्ह्यःने जक प्रकट मयासे मनय् दुने लहिना तयेगु धाःगु मखु । उकिं ला झन गुगुं नं अवस्थाय् बिस्फोटया रुप काइगु सम्भावना दयाच्वनी । उकिया कारणं मन कुण्ठित जुयाः विभिन्न मानसिक समस्या वयाच्वनी । उकिं थुकियात पूर्णतयाः समन यायेमाःगु व अथे यायेगु विधिया बारय् वसपोल पाखें कनाबिज्याःगु दु ।

आर्यअष्टांगिक मार्गया सम्यक संकल्प कथं मनूतय् न्ह्याबलें कामया संकल्प जायाच्वनी, उकियात मदयेकेगु लागि नैष्क्रम्यया संकल्पया अभ्यास यायेमाःगु खँ कनाबिज्याःगु दु । कामरागया पाखें तापाना वासनारहित जीवन ब्यतित यायेगु लागि अशुभ निमित्त व अशुभ भावनाया अभ्यास बुद्धं कनाबिज्याःगु दु ।

कामवासनायात व्यवस्थित यानाः अन्तय् पूर्ण रुपं शुद्धगु ब्रम्हचर्य पालन याना दुःखं मुक्तगु निर्वाण प्राप्त यानाः कचवं मदुगु जीवन हनेपाखे अभिमुख जुइत बुद्ध शिक्षाया विकल्प मेगु मदु ।

अशुभ ध्यानद्वारा काम भावनायात नियन्त्रण यायेफइगु व विपश्यना ध्यानं पुर्ण मुक्त जुइफइगु जुयाच्वन । कामवासनारत जुयाच्वंपिं गृहस्थपिंत नं कामवासनाय् संयम जुइमाःगु खँ वसपोलं कनाबिज्याःगु दु । पञ्चशीलय् व्यभिचार पाखें तापायेगु, शीलया पालनया अपरिहार्यता कनाबिज्याःगु दु ।

कलाः–भाःत थवंथवय् इमान्दार जुयाः परस्त्री व परपुरुष गमन यायेगु प्रवृतिपाखें पूर्णरुपं तापायेफुसा गृहस्थ जीवन कचवं मदयेक न्ह्यावनीगु खँ बुद्धं विभिन्न सुत्रय् कनाबिज्याःगु दु । बुद्धं स्वंगू धूत वा नशाया खँ पराभव सुत्रय् कनाबिज्याःगु दु । व खः– मादक पदार्थ, जू म्हितेगु अले मिसागुलु वा मिजंगुलु जुइगु ।

थुकी छम्ह मिजं थः मिसानाप जक सन्तोष मजूसे मेपिं नाप सम्बन्ध तःजुइगु वा छम्ह मिसा थः मिजं नाप सन्तोष मजुयाः मेपिं मिजंतनाप सम्बन्ध तःजुइगुयात नं तःधंगु नशा वा धूत कथं कनाबिज्यानाः थजाःगु धूत पाखें जीवन पतन जुइगु खँ कनाबिज्याःगु खः । गृहस्थ जीवनय् काम वासनायात व्यवस्थित याये मफयाः बहुविवाह, अनमेल विवाह अले व्यभिचारी जुयाः जीवन विते याःपिनिगु धन, जन, स्वास्थ्य, इज्जत न्हनावनीगु खँ आपालं प्रसंगत पराभव सुत्रय् न्ह्यथना तःगु दु ।

भगवान बुद्धं गृहस्थीतय्त व्यभिचार पाखें तापायेगु शिक्षा पालन यायेमाःगु कथं पञ्चशीलया शिक्षा बियातःगु दु । ब्रम्हचर्यायात अनिवार्य यानातःगु मदु । तर नं ब्रम्हचर्य उन्मुख जुइगु लागिं विभिन्न इलय् ब्रम्हचर्यया अभ्यास यायेमाः धका अष्टशीलया शिक्षा बियाबिज्याःगु दु । कामयात व्यवस्थित यायेत पञ्चशील व उकिया पाखें पूर्ण उन्मुक्ति जुइगु लागि अष्टशीलया शिक्षापदया निर्देशन भगवान बुद्धं यानाबिज्याःगु खः । थुकथंया शिक्षाया उद्देश्य अन्ततः पूर्ण ब्रम्हचारी पालन यायेगु लागिं हे खः ।

कामवासनायात संयम याये मफयेवं जुइगु विभिन्न अपराधिक गतिविधि
कामवासनायात संयम याये मफयेवं विभिन्न कथंया आपराधिक गतिविधिं विभिन्न कथंया सामाजिक समस्या बढे जुयाच्वंगु दु । यौनशोषण, बलात्कार, हिंसा, बालविवाह, बहुविवाह, अशान्त दाम्पत्य जीवनया मूलकारण कामवासनायात संयम यायेमफइगुलिं हे खः ।

आध्यात्मिक गुरु धायेका जूपिं अले पद प्रतिष्ठा कमे यायेधुंकूपिं नं कामवासनाया कमजोरीइ फँसे जुयाः च्वकाय् च्वनेधुंकूपिं जमिनय् चातुवाना वंगु विभिन्न घटना झीगु न्ह्यःने जुयाच्वंगु दु । परापूर्वकालया ऋषिमुनिनिसें आधुनिककालया धर्मगुरुपिं तकं कामवासनाय् फसे जुयाः थःगु पद व प्रतिष्ठा तंका च्वनेमाःगु यथार्थ विद्यमान जुयाच्वंगु दु ।

विश्वामित्र ऋषिया तप भंग मेनका धाःम्ह अप्सरां यानाबिल । समकालीन भारतय् नांजाःपिं आशाराम बापू, गुरमीत रामरहिम, नारायण साइ आदि धर्मगुरुपिं व्यभिचार व बलात्कार आदि यौन अपराधय् लिप्त जूगु कारणं जेलय् कुनातःगु दु । बुद्धकालीन इलय् आपालं भिक्षुपिं ब्रम्हचर्यय् च्वनेमफयाः चीवर त्वतेमाःगु खँ बौद्ध साहित्यय् उल्लेख दु ।

कामवासनाय् चुल्लुइवं पाराजिका जूपिं आपालं भिक्षुपिं वर्तमान अवस्थाय् नं दु । कामवासनाय् थःत संयम यायेमफयाः विभिन्न राजनैतिक नेतातय्सं थःगु पद त्वःतेमाःगु व बदनाम जुइका च्वनेमाःगु अवस्था दु । अमेरिकाया लोकंह्वाःम्ह राष्ट्रपति विल क्लिन्टन मोनिका नापया अवैध सम्बन्धया कारणं तःधंगु बदनाम जुइका च्वनेमाल ।

हालसालय् नेपाःया सभामुख थेंजाःगु तःधंगु पदय् आसिन व पूर्व अर्थमन्त्री तकं जुइत ताःलाःम्ह विशिष्ट व्यक्ति थ्व हे धूतय् लानाः चच्छिया
दुने पदपाखें अलग जुयाः सकस्यां घृणा याकाच्वनेमाःगु खँ उल्लेखनीय जू । थः मिसा बाहेक मेम्ह हे मिसानाप तयाच्वंगु अवैध सम्बन्धया कारणं वयागु अपाय्धंगु पद गुमे जुल नापं गुबलें हे हानं उगु थासय् मथ्यनीगु कथं वयागु जीवन तबाह जूवंगु नकतिनिया हे खँ जुल ।

मनयात ची मफयाः, चञ्चल मनया कारणं जूवनीगु थज्याःगु व्यभिचार थौंकन्हय् झन् झन् बढे जुजुं वनाच्वंगु व परिवारय् कलह व परिवार छिन्नभिन्नया कारण जुयाच्वंगु वर्तमान अवस्थाया यथार्थ खः । व्यभिचारं जुइफुगु थज्याःगु तबाह तापाकेत बुद्धशिक्षाया अभ्यास आवश्यक जू ।कामवासना पूर्णरुपं दुःख मुक्तिया मार्गय् थ्यंकेत अभ्यास यायेमाःगु ध्यानया परमसत्रु जुयाच्वंगु प्रत्येक ध्यानीं अनुभव यानाच्वनी ।

उकिं बुद्धं ब्रम्हाचर्य, अन्तिम सत्यया साक्षात्कारया लागि अपरिहार्य धकाः धयाबिज्याःगु खः । बुद्धया शिक्षाय् व्यभिचार अले कामवासनाया दुर्गुण नापं थुकिया पाखें सहज रुपं तापायेगु विधि उल्लेख जुयाच्वंगु दु । कामवासनायात व्यवस्थित यानाः अन्तय् पूर्ण रुपं शुद्धगु ब्रम्हचर्य पालन याना दुःखं मुक्तगु निर्वाण प्राप्त यानाः कचवं मदुगु जीवन हनेपाखे अभिमुख जुइत बुद्ध शिक्षाया विकल्प मेगु मदु ।