पीसीआर शुल्क समायोजन मयाःसा कारबाही

येँ (नेपालभाषा टाइम्स) – स्वास्थ्य तथा जनसंख्या मन्त्रालयं च्यागू निजी प्रयोगशालायात पीसीआर टेष्टया शुल्क समायोजन यायेत नीप्यघौया अल्टिमेटम बिउगु दु। मूल्य समायोजना मयात धाःसा पीसीआर टेष्टया निंतिं बिउगु स्वीकृति खारेज यानाः कालोबजारी ऐन कथं कारबाही यायेगु ख्याच्व नं मन्त्रालयं बिउगु दु। सरकारं भदौ २८ गते निसें पीसीआर टेष्टया शुल्क निद्वः तकाः क्वःछिउगु खःसा स्टार अस्पताल, ह्याम्स, बीएन बी, मेडिसिटी, डिकोज जिनोमिक्स एण्ड रिसर्च सेन्टर, सौर्य हेल्थ केयर, सेन्ट्रल डायगोनोसिस्ट व इन्ट्राप्रिड डायगोनोसिस्टं मंकाः कथं ३८९९ तका शुल्क क्वःछिउगु खः ।

ल्याबतय् अनुगमन याःगु गुणस्तर मापन तथा नियमन महाशाखां क्वःछिनातःगु स्वयां अप्वः शुल्क काःगु प्रतिवेदन स्वास्थ्य मन्त्रालय लःल्हाःगु खः । थ्व धुंकाः ल्याबयात सचेत यासें नीप्यघौ दुने शुल्क समायोजन मयात धाःसा परीक्षण स्वीकृति खारेज यायेत राष्ट्रिय जनस्वास्थ्य प्रयोगशालायात निर्देशन बीगु निर्णय याःगु खः ।