यलय् कोरोनां सीपिंत १ लाख २० हजार तका राहत
यल- यल महानगरपालिकां कोरोनापाखें संक्रमित जूपिं बिरामीतय्त बीगु वासः व राहत सम्बन्धी निर्देशिका–२०७८ या छुं प्रावधान बारे स्पष्ट याःगु दु । यल मनपां म्हिगः छगू विज्ञप्ति जारी यासें कोरोना संक्रमणं मृत्यु जूपिं मनूतय् छेँजःयात बीगु राहत व ग्वाहालिया बारे द्विविधापूर्ण खँ पिहां वःगुलिं उकियात स्पष्ट याःगु खः ।
यल मनपाया प्रवक्ता राजु महर्जनया कथं वंगु छुं न्हि न्ह्यः च्वंगु नगरसभाया बैठकं याःगु निर्णय कथं कोरोना संक्रमण जुयाः अस्पताल, आइसोलेसन सेन्टर वा मेगु थासय् सीपिनि छेँजःयात राहत स्वरुप १ लाख २० हजार तका बीगु खँ स्पष्ट यानादीगु दु ।
कोरोना संक्रमित जुयाः आईसीयु वा भेन्टिलेटरय् वासः याकाच्वंपिं नगरवासीयात वासः खर्च व राहत कथं ६० हजार तका दां बीगु खँ निर्देशिकाय् न्ह्यथनातःगु दु ।
उकथं हे निर्देशिकाय् संक्रमण पुष्टि जुयाः अस्पताल वा स्वास्थ्य संस्थाय् भर्ना जुयाः सामान्य वासः याकाः संक्रमण मुक्त जूपिं मनूतय्त अस्पतालया बिलया आधारय् ३० हजार तका राहत बीगु खँ नं न्ह्यथनातःगु दु ।
वासः यायेत वा राहत कायेगु निंतिं संक्रमित व्यक्तिं अस्पताल वा स्वास्थ्य संस्थाय् भर्ना जुयाः उपचार याकूगु जुइमाः । अज्याःगु राहत वा वासः खर्च थगुने २०७७ साल साउन १ गते लिपा संक्रमित जूपिं व यल मनपाया स्थायी वासिन्दा जुइमाःगु खँ नं धाःगु दु ।
उकथं हे विज्ञप्तिइ वंगु २०७८ असार ६ गते स्वयां न्ह्यः संक्रमित जूपिनिगु हकय् ६० न्हुया दुने यल मनपाय् भ्वं पेश यायेमाःगु व्यवस्था यानातःगु दु । ग्वाहालि कायेगु नितिं कोरोना संक्रमित पोजिटिभ जूगु पीसीआर रिपोर्ट, संक्रमितया म्हसीका खुले जुइगु भ्वं, अस्पतालय् भर्ना जूगु व डिस्चार्ज जूगु तिथि न्ह्यथनातःगु भ्वं, कोरोनां कयाः सीपिनिगु हकय् अस्पतालं बिउगु मृत्यु प्रमाणपत्र, सम्बन्धित वडा ज्याकुथिं जारी याःगु मृत्यु दर्ता प्रमाणपत्र, सीम्हेसिया लिसे नाता खुले जुइगु भ्वं, होम आइसोलेसन वा
मेथाय् सीगु खःसा वडा कार्यालयया सिफारिस व सीम्हेसिया व्यवस्थापन जूगु पुष्टि जुइगु भ्वं पेश यायेमाःगु खँ नं निर्देशिकाय् न्ह्यथनातःगु दु ।
LEAVE YOUR COMMENTS