जैशिदेवल युथ क्लबया सचेतना ज्याझ्वः

येँ – कोरोना भाइरस (काेभिड-१९) विश्वयंकं महामारी जुइवं येँ देय् त्वःता वनीपिं छक्वलं अप्वः जूगु खः । तर छुं ई थुके स्वनिगलं पिनेया जिल्लाय् संक्रमिततय् ल्याः अप्वया वनेवं स्वनिगलय् वइपिं मनूत ल्याः नं अप्वयावःगु दु ।

संक्रमणया ईलय् छगू थासं मेगू थासय् जुइवलय् खतरा अप्वइगु खँयात वाःचायेकाः येँ महानगरपालिकाया वडा नं २१या जैशिदेवल युथ कलबं थौं सचेतना ज्याझ्वः न्ह्याकूगु दु । न्हापा येँय् बांलाच्वनाच्वंपिं तर काेराेनाया ग्याचिकुं गांमय् वनाच्वंपिं व लिपा गामय् थुगु ल्वय्या त्रास अप्वया वयेवं हाकनं येँ वयेगु क्रम अप्वगुलिं जैशिदेवल युथ कलबं थौं सचेतना ज्याझ्वः न्ह्याकूगु खः ।

कोराना ल्वचं बचे जुइत व स्थिति भयवह जुइमबीत स्थानीय छेँथुवाःपिंत थःगु छेँ वा पसलय् बालं तयातइपिं पिनेयापिं मनूत दुहां वःगु दुसा इमिगु स्वास्थ्य परीक्षणया रिर्पोट स्वयाः जक थःपिनिगु छेँय् दुकायेत क्लवं इनाप याःगु दु । नापं अज्याःपिं सुनं मनूत उगु लागाय् वःगु दुसा वडा वा प्रहरी ज्याकूथी तुरुन्त जानकारी बियादीत नं इनाप याःगु दु ।

क्लवया अध्यक्ष राजेश प्रजापतिया कथं लकडाउन जुइवं जैशिदेगः लागाय् जक २००म्हं मल्याक बालं च्वनाच्वंपिं पिहांवंगु खः । तर नकतिनि पिनेंवःपिं लिहांवःगु व आपालं दुहां वयेत्यंगु जानकारी वःगु नं वय्कलं धयादिल । नकतिनि वःपिं निम्हेसित प्रहरीं यंकाः क्वारेन्टिनय् तःगु दुसा मेम्ह छम्ह धाःसा सेफ क्वारेन्टिनय् च्वनाच्वंगु जानकारी नं वय्कलं बियादिल ।