एनआरएनया अध्यक्षया निंतिं प्यम्ह प्रतिस्पर्धी

येँ (नेपालभाषा टाइम्स)÷ देशं पिने च्वनाच्वंपिं नेपाःमितय् संगठन गैर आवासीय नेपाली् संगठन (एनआरएन)या तःमुँज्या मंगलवाः निसें येँय् सुरु जुल । झिंछक्वःगु तःमुँज्या व विश्व सम्मेलनय् राष्ट्रपति रामचन्द्र पौडेलं उलेज्या यानादीगु खः ।

थुगुसीया तःमुँज्या संगठनया न्हूगु कार्यसमिति नं ल्यइगु ज्याझ्वः दु । थुगुसी एनआरएनया अध्यक्षया निंतिं प्यम्हेस्यां उम्मेदवारी बिउगु दु । पुलांपिं अध्यक्षपिं बद्री केसी व रविना थापा लिसें उपाध्यक्षपिं महेश श्रेष्ठ व आरके शर्मां अध्यक्षय् उम्मेदवारी बिउगु खँ एनआरएनए सचिवालयं धाःगु दु ।तःमुँज्यां मुक्कं ७४ म्ह अन्तर्राष्ट्रिय समन्वय परिषद्या पदाधिकारीतय् निर्वाचन जुइ ।

एनआरएन सन् २००३ अक्टोवर ११ य् येँ न्हापांगु विश्व सम्मेलन यासें स्थापना याःगु खः । थ्वयां न्ह्यः सन् २००३ अगस्टय् लन्डनय् छगू भेला यासें व्यापक सहलह ब्याकाः एनआरएन स्थापना यायेगु क्वःछिउगु खः । एनआरएनय् थौंकन्हय् विश्वन्यंकं च्वनाच्वंपिं छगू लाख नेपालीत संगठीत जुयाच्वंगु दुसा ८६ गू देशय् थुकिया सञ्जाल विस्तार यायेधुंकूगु दु । लिपांगु निगू दशकया दुने विदेशय् च्वनाच्वंपिं नेपालीतय् पाखें करिब छगू खर्ब लगानी नेपालय् दुहां वःगु संगठनया अनुमान दु । आर्थिक लगानी लिसें बौद्धिक लगानी दुत हयेत नं संस्थागत कुतः जुयाच्वनीगु खँ संस्थां धाःगु दु ।

थुगुसीया सम्मेलन व तःमुँज्या कात्तिक ३ गते तक न्ह्याइ । थुगुसी ‘नेपालीया निंतिं नेपाली’ धयागु मू नारा व ‘ज्ञान व रुपान्तरण समृद्धिया आधार’ विषयय् केन्द्रीत जुयाः विश्व सम्मेलन व तःमुँज्या जुयाच्वंगु खः । सम्मेलनया झ्वलय् असोज ३० व कात्तिक १ गते विश्व ज्ञान सम्मेलन, युवा सम्मेलन व महिला सम्मेलन, वैदेशिक रोजगार तथा सामाजिक सुरक्षा कोष एवं नागरिकता ऐन व मताधिकार सम्बन्धय् विशेष सत्र जुइ । अथेहे कत्तिक २ गते एनआरएनएया न्हूगु नेतृत्व ल्ययेत निर्वाचन जुइ ।

एनआरएनएया प्रवक्ता सोम सापकोटाया कथं थुगुसी न्हापांखुसी ‘फेसियल भेरिफिकेशन’ पाखें अनलाइन भोटिङ यायेत्यंगु खः । निर्वाचनय् ५९ गू देसं ४२२७ म्हे महाधिवेशन प्रतिनिधि ब्वति काइ । संसारया गुगुं नं थासय् च्वनाः याउँक मतदानय् ब्वति कायेफइगु व्यवस्था यानागु व नेपालय् वःपिंसं नं थन सम्मेलन स्थलय् हे व याः अनलाइन भोटिङया व्यवस्था यानागु खँ प्रवक्ता सापकोटां कनादीगु दु ।

न्ह्यात गैरआवसिय नेपाःपिंत नागरिकता बीगु ज्या
नेपाल सरकारं गैरआवासीय नेपालीपिंत गैरआवासीय नागरिकता बीगु ज्या न्ह्याकूगु दु । प्रधानमन्त्री निवास बालुवाटारय् मंगलवाः छगू ज्याझ्वःया दथुइ प्रधानमन्त्री

पुष्पकमल दाहालं गैरआवासीय नेपाली संघ (एनआरएनए)या कार्यकारी अध्यक्ष बद्री केसी व अध्यक्ष कुल आचार्यपिंत गैरआवासीय नागरिकता लःल्हाःगु खः ।
जिल्ला प्रशासन ज्याकुथि येँपाखें थ्वहे असोज २९ गते कार्यकारी अध्यक्ष केसी व जिल्ला प्रशासन ज्याकुथि पर्वतं थ्वहे असोज २८ गते अध्यक्ष आचार्यया नामय् नागरिकता जारी याःगु खःसा उगु नागरिकता निगुलिं जिल्लाया प्रमुख जिल्ला अधिकारीं प्रधानमन्त्रीयात लःल्हाःगु खः ।

नेपाःया संविधानया धारा १४ य् गैरआवासीय नेपालीयात नागरिकता बिइफइगु व्यवस्था दु । विदेशी मुलुकया नागरिकता प्राप्त याःगु दक्षिण एसियाली क्षेत्रीइ सहयोग संगठन सार्क दुजः राष्ट्र बाहेकया देसय् च्वनाच्वंपिं साविकय् वंशजया वा जन्मया आधारय् निज वा निजया अबु वा मां, बाज्या वा बज्ये नेपाःया नागरिक जुयाः विदेशी मुलुकया नागरिकता प्राप्त याःम्ह व्यक्तियात नेपाःया गैरआवासीय नागरिकता बिइफइगु संवैधानिक व्यवस्था दु ।

संविधान जारी जूगु ताःई लिपा सरकारं नेपाल नागरिकता ऐन, २०६३ संशोधन यानाः गैरआवासीय नेपालीपिंत आर्थिक, सामाजिक व सांस्कृतिक अधिकार उपभोग यायेदइगु कथं नागरिकता बीगु व्यवस्था याःगु खः ।

७७ गू जिल्लापाखें गैरआवासीय नेपाली नागरिकता प्राप्त यायेगु व्यवस्था मिलेयाःगु गृहमन्त्रालयया सचिव दिने भट्टराई नं जानकारी बिउगु दु । गैरआवासीय नेपाली नागरिकताया नितिं थौंनिसें गैरआवासीय नेपालीं आवेदन बिइफइगु जूगु दु । वइगु कार्तिक १ गतेनिसें फुक्क जिल्ला प्रशासन ज्याकुथिपाखें गैरआवासीय नागरिकता बीगु वं धाःगु दु ।

गैरआवासीय नेपालीं ताःई न्ह्यःनिसें थःपिंत नेपाली नागरिकता बिइत माग यानाः वयाच्वंगु खः ।