न्युनतम मंकाः ज्याझ्वः पित बीगु तयारी

येँ – सरकार प्रभावकारी रुपं न्ह्याकेगु नितिं न्यूनतम मंकाः ज्याझ्वः याकनं क्वःछीत माओवादी केन्द्रं आह्वान याःगु दु । म्हिगः पार्टी केन्द्रीय ज्याकू पेरिस डाँडाय् च्वंगु स्थायी कमिटीया बैठक न्यूनतम मंकाः ज्याझ्वः वा प्राथमिकताया ज्याझ्वः याकनं क्वःछीत सत्ता गठबन्धनयात इनाप याःगु खः । उकथं हे बैठकं माओवादी केन्दं्र न्यूनतम मंकाः ज्याझ्वः क्वःछीत पार्टीपाखें नेता देव गुरुङ व वर्षमान पुनयात निर्देशन नं बिउगु दु ।

माओवादी केन्द्रया नेता नारायणकाजी श्रेष्ठं गठबन्धन सरकार न्यूनतम मंकाः ज्याझ्वःपाखे न्ह्याः वनेत गठबन्धनय् दुथ्याःगु पार्टीतय् दथुइ न्यूनतम मंकाः ज्याझ्वः व प्राथमिकताया ज्याझ्वः याकनं हे क्वःछीत इनाप यानागु खँ धयादीगु दु ।

श्रेष्ठया कथं गठबन्धनया शीर्ष नेतातय् दथुइ न्यूनतम मंकाः ज्याझ्वःया गृहकार्य यायेगु समझदारी जूसां नं औपचारिक रुपं कार्यदल धाःसा गठन जूगु मदुनि ।

उकथं हे म्हिगःया बैठकय् मन्त्रिपरिषदय् छ्वयेगु नांया बारे सहलह मजूगु खँ धासें वय्कलं कनादिल, ‘गठबन्धनया फुक्कं दल व समर्थन याःपिं सांसदतलिसे सहलह जुयाच्वंगु दु, फयांफछि फुक्कं पार्टीया प्रतिनिधित्व जुइ कथं सरकारयात पूर्णता बीगु पाय्छि जुइ, अथे जुयाः गठबन्धनया फुक्कं शक्तित लिसे सहलह यानाः सरकारयात पूर्णता बीगु निर्णय जूगु दु ।’