चीन-अमेरिकाया शीतयुद्ध कोरोनाया महामारी स्वयां खतरा

एजेन्सी – विश्वय् नांजाःम्ह अर्थशास्त्री जेफ्री स्याक्सं चीन व अमेरिका दथुया तच्वया वनाच्वंगु शीतयुद्ध विश्वया निंतिं कोरोना भाइरस स्वयां तःधंगु चिन्ताया विषय जूगु खँ धयादीगु दु । वय्कलं बिबिसीलिसे खँ ल्हासें कोरोना भाइरसया महामारीलिपा संसार नेतृत्वविना तःधंगु अस्तव्यस्त ईपाखे न्ह्याःवनीगु खँ धयादीगु दु ।

निगू तःधंगु शक्ति राष्ट्र दथुइया मतभेदं थुकियात अझ बांमलाःगु स्थितिइ यंकीगु वय्कःया बिचाः दु । कोलम्बिया विश्वविद्यालयया प्राध्यापक स्याक्सं निगू देय् दथुइ तनाव तच्वया वनाच्वंगुलिइ अमेरि की प्रशासन जिम्मेवार दुगु खँ नं धयादीगु दु । बिबिसीया एशिया बिजनेस रिपोर्टया निंतिं अन्तर्वार्ता बियादिसें वय्कलं धयादीगु दु, ‘अमेरिका विभाजन हइगु शक्ति खः नकि सहकार्य याइगु शक्ति ।’

अमेरिका व चीन दथुइ व्यापारया विषयय् जक मखु मेमेगु तःगू हे मुद्दाय् तनाव अप्वया वनाच्वंगु इलय् अर्थशास्त्री स्याक्सया थ्व धापू वःगु खः । छुं न्हि न्ह्यव जक अमेरिकी राष्ट्रपति ट्रम्पं चीनया सिन्जियाबय् मुस्मांतय्त जूगु दमनय् संलग्न धयातःपिं चिनियाँ अधिकारीतय् विरुद्ध प्रतिबन्ध तयेगु विधेयकय् हस्ताक्षर यासें वैधानिकता बिउगु खः । द वाल स्ट्रिट जर्नलयात बिउगु छगू अन्तर्वार्ताय् राष्ट्रपति ट्रम्पं आर्थिक प्रतिस्पर्धायात अस्थिर दयेकेगु निंतिं चीनं अन्तर्राष्ट्रिय रुपं कोरोनाभाइरस न्यंकेत प्रोत्साहित यानाच्वंगु खँ धयादीगु खः ।

ट्रम्प प्रशासनं खास यानाः चिनियाँ दूरसञ्चार कम्पनी हुवावे लगायतया कम्पनीयात नं निशाना दयेका वयाच्वंगु दु । ग्राहकतय् जासुसी यायेत थुकिया छ्यलाबुला जुयाच्वंगु वाशिंगटनं बेइजिङ्गयात द्वपं बीगु यानाच्वंगु दु । तर हुवावें थें बेइजिबं नं थ्व द्वपंयात अस्वीकार याना वयाच्वंगु दु ।

तर राष्ट्रपतिया पुलांम्ह सुरक्षा सल्हाकार जोन बोल्टनं थःगु न्हूगु सफुतिइ न्ह्यथनातः कथं चीन व हुवावेप्रति ट्रम्पं काःगु कडा अडान पुनः निर्वाचित जुइगु छगू रणनीति जुइमाः । हुवावेयात निशाना दयेकूगु धयागु सुरक्षा सम्बन्धी चिन्ता जक मखु धयागु खँय् प्राध्यापक स्याक्स नं सहमत खनेदु ।

‘फाइभ जीया सन्दर्भय् अमेरिका लिउने लात, गुगु न्हूगु डिजिटल अर्थतन्त्रया छगू महत्वपूर्ण ब्व खः व हुवावें विश्व बजारय् तःधंगु थाय् कयाच्वंगु दु । जिगु बिचारय् अमेरिकां हुवावे विश्वया लागि छगू खतरा धयाच्वंगु खँ नं छगू बहाना दये काच्वंगु खः व हुवावेलिसे स्वापू त्वाथलेत वयात थः साझेदारतय् साथ मालाच्वंगु दु ।’