ने. सं. ११४३ तछलाथ्व त्रयोदशी -

हाकनं एमसीसीया हे चर्चा

नेपाली जनताया ब्यापक विरोधया बावजुद नं नेपाल कम्युनिष्ट पार्टी (नेकपा)या बैठकं मिलिनियम च्यालेन्ज कर्पोरेशन (एमसीसी) पारित यायेगु निर्णय याःगु दु। अमेरिकी शताब्दी चुनौती मिलिनियम च्यालेन्ज कर्पोरेशन छगू अमेरिकी साम्राज्यवादया आधुनिक हतियार खः । तप्यंक सेना छ्वयाः अतिक्रमण यायेगु थासय् सेनां सुरक्षा यानाः थीथी कथंया लगानी दुगु कथं क्यनाः स्थानीय जनतायात खने मदयेक दास यायेगु अमेरिकी सोच खः थ्व । उकिं सेवा खने दइगु तर अधिकारं बञ्चित जुइधुंकूगु मचाःगु व सचेत जुइ मफुगु गुलिखे देसय् अमेरिकी साम्राज्यवादं थ्व कर्पोरेशन लागू यानाः धमाधम थःपिनि हैकम कायम यानाच्वंगु दु। क्वः धइपिं विश्वय् न्ह्याःगु थासय् च्वंपिं जूसां हाकुसे च्वनी । अथे हे शोषकत धइपिं नं विश्वन्यंकं न्ह्याथाय् च्वंसां अत्याचारी जुयाच्वनी । मेपिंत शोषण यायेगु व थः यथे याना शासनसत्ता चले यायेगु अमेरिकी साम्रज्यवादया धर्म खः । विश्वय् न्ह्याःगु देसय् च्वनाः जूसां उमिसं आतकं यानाच्वंगु थथे हे जक खः । गबलें इमिसं जनताया हीतय् ज्या मयाः ।

निक्वःगु विश्वयुद्धय् नं नेपालं अमेरिकायात ग्वाहालि याःगु खः । आः स्वक्वःगु विश्वयुद्धया हाराहारीइ नं नेपालं अमेरिकी साम्राज्यवादयात साथ बियाः थः दास मनोबृत्ति क्यनाच्वंगु दु। नेपालय् थौं निषेधाज्ञा जारी यानातःगु दु। थथे निषेधाज्ञा दथुइ सरकारं एमसीसी पारित यायेगु निंतिं सत्तारुढ दलं चाल म्हिताच्वंगु दु ।

झलनाथ खनालया अध्यक्षताय् दयेकूगु अध्ययन समितिं गथे खः अथे थ्व एमसीसीयात पारित याये मजिउगु सुझाव बिउगु कारणं थुकियात खः थें च्वंक छुँ छुँ बुँदाय् जक हिउपाः हयाः गथे खः अथेहे पारित यायेगु षडयन्त्र जुयाच्वंगु दु। थुकिं घाटा वा नोक्सान धाःसा दीर्घकालीन रुपं झी थेंज्याःगु परमुखापेक्षी राष्ट्रयात लाइगु खः । मौलिक स्वरुपं शासनसत्ता चले यानाच्वंगु गुलिखे देसय् उगु कर्पोरेशन लागु यायेवं थःपिं सत्ताशीन खः वा कथपुतली सरकार जक खः धइगु सी मंत । नेपालय् भारतीय विस्तारवादया प्रभाव व अमेरिकी साम्राज्यवादया प्रभावं अझ अप्वः नेपाः स्वतन्त्र मुलुक खः कि मखु धइगु अलमल यायेत थुकिं ज्या याइगु खने दयावःगु दु। अथे जुयाः नं सारा जनतां छप्पँछधि जुयाः थौं मिलिनियम च्यालेन्ज कर्पोरेशन (एमसीसी) खारेजया माग याःगु खः ।

नेकपा सचिवालय बैठकं एमसीसी पारित यायेगु निर्णय यायेवं छथुं हे राजनीतिक वृत्तय् भुखाय् ब्वःगु दु। थुकिया दीर्घकालीन रुपं अहित जुइगु आपालं बुँदा संशोधन यायेमाः धयाच्वंगु इलय् अथे छलफल व निष्कर्ष पित महसें थ्व इलय् सरकारवादी दलं थुकियात पारित यायेगु निर्णय याःगु धइगु थःगु तुतिइ थःम्हेसिया पां पालेथें जुयाच्वंगु दु। सरकारं उकियात पारित याकेगु मनसायं एमसीसी बारे सामाजिक सञ्जालय् न्ह्यःने लाःथे च्वयेत बर्जित यात । एमसीसीया बारे नेकपा दुने आपालं विरोध खने दयेवं पार्टी दुने उकिया विरोधय् तच्वःगु सः थ्वइ धकाः थुकथं सामाजिक सञ्जालय् च्वये मदइकथं स्वतन्त्रता हनन् यायेगु थ्व ज्या नेकपां याःगु खः । थथे ग्यानाः ग्यानाः वा मेपिंत वास्ता मयासे पारित यानाः त्वःतेगु षडयन्त्र स्वरुप थथे विरोध याये मदइगु नियम दयेकूगु खः । छगू ल्याखं पार्टी हे फुक्कं खः धाइपिं नेता व कार्यकर्तातय्त नं बञ्चित यायेगु वा प्रतिवन्ध तयेगु ज्या जूगु दु। थ्व उचित ज्या धाःसा मखु ।

थुकियात पारित याये मफुत धाःसा थःपिंसं नये धुंकूगु डलर लिहां वनी धकाः थ्व बारे नेता व सुं नं कार्यकर्तातय्त खँल्हाबल्ला वा सहलह तकं यायेमते धकाः बञ्चित याःगु खः । राजनीतिक स्वतन्त्रता बिना पारित यायेत स्वयाच्वंगु थ्व कर्पोरेशनं पार्टीइ जक मखु कि राष्ट्रयात नोक्सान यायेफु धइगु सिउ कि मसिउ ?

एमसीसी बारे खँ वयेवं सरकार ग्यानाः थुकियात पारित याये मफुत धाःसा थःपिंसं नये धुंकूगु डलर लिहां वनी धकाः थ्व बारे नेता व सुं नं कार्यकर्तातय्त खँल्हाबल्ला वा सहलह तकं यायेमते धकाः बञ्चित याःगु खः । राजनीतिक स्वतन्त्रता बिना पारित यायेत स्वयाच्वंगु थ्व कर्पोरेशनं पार्टीइ जक मखु कि राष्ट्रयात नोक्सान यायेफु धइगु सिउ कि मसिउ ? देय्न्यंकं थौं कोरोना भाइरसया कारणं निषेधाज्ञा लागू यानातःगु दु। मनूत सतकय् पिहां वयेफुगु स्थिति मदु। गथे जनताया मययेक मययेकं स्वनिगः दुने ३ नम्बर प्रदेश जुयाच्वंगु बागमती प्रदेशया प्रदेशस्तरीय रंगशाला ख्वपय् दयेकेगु ज्या सुनां मसिइक लकडाउनया दथुइ क्वचायेके त्यंगु खः, अथेहे कोरोना भाइरसया कारणं लकडाउन जुयाच्वंगु इलय् सरकारं थ्व मिलिनियम च्यालेन्ज कर्पो रेशन (एमसीसी) पारित याकेत स्वयाच्वंगु दु । सरकार जनताया विरोध न्यने चाहे मजूगु कारणं थथे बन्दाबन्दीया दथुइ थ्व मामलायात पारित यायेत स्वयाच्वंगु दु धइगु क्यं । सरकार विरुद्ध छुं नं कथंया विरोध प्रदर्शन व सभा याये मजिउगु इलय् लाक्क हे थ्व मामलायात सदनं पारित यायेत्यंगु धइगु तप्यंक हे सरकार जनता विरोधी व जालसाजी खः धइगु खनेदु ।

महामारीया कारणं सदन बन्द जुयाच्वंगु दु। थज्याःगु इलय् अध्यादेश मार्फत फुक्कं ज्या चले यायेत स्वयाच्वंगु दु। सदन चले मजूगु ई लाकाः म्हिगः नं सरकारयात ज्या छिंगु आपालं विधेयकत पारित यायेगु चलन दु। थ्व तप्यंक खुँ लँ हे खः । सार्वजनिक गोष्ठी, सभा यानाः जनतायात सचेत व सूसुचित यायेगु ई तकं मदयाच्वंगु थ्व इलय् देय् या दीर्घकालीन भविष्यलिसें स्वानाच्वंगु एमसीसी पारित यानाः कन्हय्या राष्ट्रिय जीवनय् कँ पीगु ज्या नेकपाया सरकारं यायेत स्वयाच्वंगु दु। थ्व गम्भीर मामला खः । थ्व ई जनता नये मखनाच्वंगु ई खः । कर्मचारीत जागीरं बञ्चित जुयाच्वंगु ई खः । अझ ज्या याना नइपिं ज्यापु ज्यामित ला झन हे पीडित जुयाच्वंगु ई खः । थज्याःगु प्रतिकूल परिस्थितिइ एमसीसी पारित यायेगु निर्णय याःगु धइगु ला अवश्य नं सत्तारुद दल वैचारिक वहसं बिसिउँ वनाच्वंगु हे खः ।

थीथी देसय् लागू जुयाच्वंगु मिलिनियम च्यालेन्ज कर्पोरेशनया आधार स्वयेगु खःसा अमेरिकी साम्राज्यवादं मेमेगु देसय् हमला याये मफुगु कारणं सहयोगया नामय् थीथी कथं कब्जा कायेत स्वःगु हे जक खनेदु। छुं नं देसय् निःसर्त रुपं उगु मुलुकयात दां ग्वाहालि बिउगु मदु। अथे जुयाः नं थौं गुलि नं सहयोग काःगु देय्तदु, इपिं पस्ताय् चायाच्वंगु दु। एमसीसी अमेरिकी सैनिक रणनीतिया हे हिस्सा खः । उकिं हरेक विकास निर्माणया नामय् वंगु दांया लिउ लिउ अमेरिकी सेना नं वनेगु यानाच्वंगु खः । उकिं नं नेपालय् अमेरिकी साम्राज्यवादयात दुकायेगु अःपुगु माध्यम थ्व मिलिनियम च्यालेन्ज कर्पोरेशन जुइफुगु कारणं झी इलय् हे सचेत जुइमाःगु खनेदु ।