सैद्धान्तिक सेक्स एलर्जी

थौंकन्हय् देय्या सत्तासिन दल नेकपा असाध्य ल्वचंग्रस्त खनेदु । खतुं थ्वयात ल्वचं थिउगु थौं म्हिगः मखु, इति इति जुयाच्वंगु यक्व हे दत । अय्नं क्वलाइला, स्वस्थ जुइला धइगु आशा । तर ल्वचं विकराल रुप कया हःगु खनेदइ । सत्तासिन दलया ल्वय्या हालत थौं बेठेगान । गबले छु जुइ ? हालत अनिश्चित !

मखु, सत्रासिन दलया ल्वय् छु ? छाय् थुकथं अस्वस्थ व कमजोर जुया वन ? जिज्ञासा जुयाच्वनी । हट्ठाकट्ठा दल । बलवान दल धकाः बय्बय् जूगु खः । उत्सुकता जूगुलिं छम्ह राजनीतिक डाक्टरयाके जिं न्यने, ‘सत्तासिन दल नेकपा खास छु ल्वचं पीडित जूगु खः ?’ डाक्टरं अश्लिल तर सरिककथं नेकपाया ल्वय्या बारे खुलासा याइ । डाक्टरं कंगु नेकपाया ल्वय्या बयान जिं अजू चायाः न्यने । उम्ह राजनीतिक डाक्टरं धाइ, ‘स्व भाइ ! नेकपा (एमाले) व नेकपा (माओवादी) सहवासया निंतिं ज्वःचिनेत दयेकूगु पार्टी खः । लुँयागु ख्यें थ्वयेकेगु म्हगस ज्वनाः । उद्देश्य ला बांलाःगु ज्वनाः हे निगू दल दथुइ मिलन जूगु खः । तर थ्व निगू दलया ज्वः दथुइ ‘सेक्स एलर्जी’ खने दइ । लिच्वः । इमि सहवास सुखद खने दइमखु। दुःखद् जुइ । नाप च्वंलिसे, संलिसे निगुलिं दलया म्हय् फ्वातः फ्वातः वइ । चासुसुं चासुसुं निगू दलया म्हय् घाः जुइ । निगू दल जानाः सहवासया आनन्द काये धाःगु म्हगस दक्व चकनाचूर जुइ ।’

डाक्टरं कनी, ‘स्व भाइ ! थुमि दथुइ खनेदुगु सेक्स एलर्जीया कारण नं सी दयेधुंकल । थुमि हि हे विपरित प्रकृतिया जुयाच्वन । सहवासया निंतिं बेमेलगु । उकिं हि हे दोषपूर्ण जूगुलिं इमिगु एलर्जीया उपचार नं मदु ।’

डाक्टर साहब ! ‘थ्व एलर्जी छुकिं जूगु थें ? कारण छु? सीके फइला ?’ न्यने । डाक्टरं कनी, ‘स्व भाइ ! थुमि दथुइ खनेदुगु सेक्स एलर्जीया कारण नं सी दयेधुंकल । थुमि हि हे विपरित प्रकृतिया जुयाच्वन । सहवासया निंतिं बेमेलगु। उकिं हि हे दोषपूर्ण जूगुलिं इमिगु एलर्जीया उपचार नं मदु । इमिसं ज्वःचिनाः लुँयागु ख्यें थ्वयेके फइगु अवस्था मदु। सामान्य ल्वापु जुयाः ख्यें थ्वयेके लिपा लानाच्वंसा निराश जुइमाःगु मदु। आःला निम्हेसियां हि हे मिले मजुयाः सेक्स एलर्जीया असाध्य ल्वचं थिउगु खँ वयाच्वन । उकिं नेकपाया ज्वःया सहवास अस्वस्थकर, कलहपूर्ण जुइ । सेक्स एलेर्जीया कारणं थुमित थःगु स्वापुतिं सन्तोष वइमखु, बरु दुःख बी । आः थुपिं सम्बन्ध विच्छेदपाखे उन्मुख जुइ ।’

राजनीतिक डाक्टरं ठोके यानाः धाइ । राजनीतिक डाक्टरया सत्तासिन दलया ल्वय्या बारे खँ न्यने । देशय् जुयाच्वंगु राजनीतिक कलहबारे छुं छुं थुया वःथें जुइ । निराशा नं जुइ । देय्या निगू ततःधंगु प्रगतिशील दलत ज्वःचिनाः नेकपा दयेकल । चुनावय् तःधंगु बहुमत हल । आः देशय्रा जनीतिक अस्थिरता अन्त्य जुइ । देशय् प्रगतिशी शासनं जनताया जीवनस्तर थकाइ । गरिबी निर्मूल याइ । उत्पीडित जनतायात राहत बी । देशय् वःगु शक्तिशाली शासनं अभूतपूर्व उन्नति याइ । जनतां तःधंगु विश्वास याइ । जनता उमङ्गित जुइ । तर जनताया आशा, उमङ्गियात सन्तोष जुइकथं अभूतपूर्व जनमत प्राप्त शासक दल नेकपा दम्पत्तिं छुं याये मफुत । अःखः नेकपा दम्पत्तितसें थःथः ल्वानाः देय् व जनताया निंतिं छुं याये मफुत । अःखः देय् भताभु· लथालिब स्थितिइ लाः वल । जनतां तःधंगु उन्नतिया आशा यानाः बिउगु जनमतया उपहास जुल । जनता थौं ख्वय्ला न्हिलेला । थ्व अवस्थाय् लात ।

एकचित्त यानाः सम्पूर्ण उर्जा, देश, जनताया निंतिं छ्यलेमाःगु अवस्थाय् सत्तासिन पार्टी अन्तर कलहय् दुनाच्वंगु दु । ल्वापु चरम सीमाय् थ्यनाः दल दुने काटमारया अवस्था वयेधुंकूगु दु । सरकार संचालन यानाः देशय् शान्ति सुरक्षा कायम यायेमाःगु सत्तासिन दल हे थौं आन्दोलनय् ! छगू हे सत्तासिन दलया निगू खेमा दथुइ खने दयाच्वंगु थ्व ग्यानापुगु कलहं देशय् गृहयुद्ध हइगु सम्भावना थना बिउगु दु। दकलय् ग्यानापुगु देय्या स्थिति खः । थौं देशय् वैकल्पिक शक्ति, नेतृत्व हे मदु। शून्य ! थज्याःगु शून्यताय् न्ह्याम्हेसिनं न्ह्यागु याःसां छुट दयाबी । देय्या संवैधानिक अ·त, प्रशासन, राज्यया संस्थात फुक्क देय्या दलीय राजनीतिक चङ्गुलय् । स्वतन्त्र संस्थागत रुपय् इपिं विकास जुइ फुगु मखु। निरपेक्ष रुपय् इपिं जनताप्रति प्रतिवद्ध जुइ फुगु मखु ।

थौंया दकलय् न्ह्यःनेया चिन्ता नेकपा दुनेया दलया कलहं गुगु रुप काइ धइगु जुइ । सरकारय् दुगु दल जूगुलिं थुमिगु ल्वापुं देय्या सरकार संचालनय् नं प्रभाव लाइ । अनेक समस्या, अवरोध श्रृजना याइ । थौंया थ्व परिस्थितिया कारण नेकपा दल दुनेया कलह खः । थन थाय्रा जनीतिक डाक्टरं धाःगु खँ लुमनी । ‘हि हे मिले मजूगु एमाले व माओवादीया जबरजस्त मिलन, सहवासं हःगु थ्व सैद्धान्तिक सेक्स एलर्जीया लिच्वः खः ।’