जापानय् पद्मरत्नया एन्जियोप्लास्ट

सुमन श्रेष्ठ

‘झी पद्मरत्न’ अभिनन्दन ग्रन्थय् हनेबहम्ह भाजु अनाररत्न वज्राचार्यया च्वसु पिदंगु जुयाच्वन । जि थः हे नं व खँनाप स्वाःम्ह जूगुलिं जितः वय्कःया च्वसु पाय्छि मताल । जि लुमंकथं सत्यतथ्य खँ थथे खः । २०४६÷०४७ सालया जनआन्दोलनया अभूतपूर्व सफलताया लकस न्यंकभनं ब्वलनाच्वंगु ई । जनतां लसतां भय् बीकाः देसय् आः ला छुं बांलाःगु हिउपाः अवश्य नं वइ जुइ धइकथंया अपेक्षा यानाच्वंगु व ई ।

छन्हु सुथय् जिमि बाःनं पद्मदाईया उसाँय् पाय्छि मजू धइगु दुःखद् खँ न्यंकादिल । जापानय् वासः याकेत न्यनेकने याना स्वये मफइला धकाः उत्सुकता नं क्यनादिल । अबलय् तक झीथाय् मजूनिगु ‘एन्जिोप्लास्ट’ यायेमाःगु जुयाच्वन पद्मदाइयात ।स्याःन्याःम्ह जापानी पासा सिरो कुराउचीयात फोन यानाः थ्व खँ ब्याका ।

जापानी नागरिकतय् निंतिं हे नं थिकेगु थ्व उपचार विधि उकिसनं जापानय् वामपन्थी विचाःयापिं धालकि मेगु हे कथं स्वइगु थासय् झी पद्मदाइ जुल झन् हे वामपन्थी जननेता । उकिसनं नांदंम्ह, उकिं थ्व खँ सहज रुपं जुइ धकाः जिं अबलय् मतायेकागु नं खः । तर छुं दिं लिपा हे जापानी पासा कुराउचीया फोन वल ।

पद्मरत्नयात विदेशय् वासः याकेमाःगु कारण छु छु खः, अले वय्कःया नेपालय् योगदान छु छु खः धइगु खँत ध्वाथुइक छसिकथं च्वयाः याकनं फ्याक्स यानाः हजि धयाहल । जिं नं उघ्रिमय् ‘ए–फोर’ साइजया निपाः भ्वं जायेक पद्मदाइयाबारे ‘जनतां तःजिक हनातःम्ह जननेता खः ।’ अथे जूगुलिं वय्कःया जीवनरक्षा व ताःआयुया कामना जनतां यानाच्वंगु दु धकाः फ्याक्स यानाछ्वया ।

फ्याक्स याना छ्वयागु निन्हु–प्यन्हु लिपा पासा कुराउचीया लिसः वल । डा. सिन्जाबुरो कुबोताजुं योकोहामाया छगू अस्पतालय् जापानी नागरिक सरह हे वासः याके फइगु यानाः खँ ल्हानादीगु जुयाच्वन । थुलि खँ न्यनेवं हे मनय् स्वां ह्वल । वासः ला याके फइगु जुल, अनंलि ध्यबाया ज्याखँ ताःलाकेत पासा कुराउची व जिं थःथःगु कथं आर्थिक ग्वाहालिमि जापानी पासापिनि नांधलः दयेकाः सकलसित इनाप यानाछ्वया ।

भिसा व मेमेगु माःमाःगु सकतां भाला जापानी पासा कुराउची हे कुबियादिल । थनं लिपा तिथि ला लुमं मजू, पद्मदाइ व पीतयात ज्वनाः जि याकनं हे जापान वनागु खः । थ्यंमथ्यं ३० दँ न्ह्यवया थुगु खँ लुमंका च्वँच्वं उगु इलय् नुगः क्वसायेकाः ग्वाहालि यानादीपिं जापानी पासा कुराउची, डा. कुबोता , थाकाओका गुरुजु, चिकित्सक–नसिंङ टोलीलिसें सकल नेपाःमि व जापानी पासापिंत दुनुगलंनिसें हनाबनातसें हाकनं छक्वः सुभाय् देछायाच्वना । पद्मरत्नया सेवा हे गुगु छगू जक जिगु स्वार्थ खः, व पू हे वन, जि धन्य जुइखन !