सापारुया झ्वलय् सायाः नखः

यल(नेपालभाषा टाइम्स)- झीगु सः व सुकुन्दा फिल्म्सया मंकाः ग्वसालय् सापारुया लसताय् वइगु भदौ ४ गते शनिवाः सायाः नखः जुइगु जूगु दु । यलया भोलध्वाखाय् च्वंगु ज्यापु समाजया भवनय् उगु ज्याझ्वः जुइगु जानकारी पत्रकार सम्मेलनय् बिउगु दु । लोकंह्वाःपिं कलाकारतय् प्रस्तुति दइगु ज्याझ्वः निगू शो क्यनेगु नं पत्रकार सम्मेलनय् जानकारी बिउगु दु ।

झीगु सःया संरक्षक नापं वरिष्ठ सिने पत्रकार विजयरत्न तुलाधरं ख्यालि नखः ज्याझ्वःपाखें संकलन जूगुमध्ये छुं ध्यबा थौंकन्हय् वासः याकाच्वनादीम्ह गायक व संगीतकार सुमन कपालीयात ग्वाहालि यायेगु जानकारी बियादीगु दु ।

नेवाः पत्रकार राष्ट्रिय दबूया केन्द्रीय नायः सुरजवीर वज्राचार्यं स्वनिगःलिसें नेवाःतय् वस्तीइ नेपाल संवत्कथं झिगूगु ला गुंला पारुनिसें छवाःतक थीथी थासय् ख्यालः क्यनेगु न्हापांनिसें परम्परा दया वयाच्वंगु खःसा विगतय् त्वाः त्वालय् दबू दयेकाः नं थुकथंया ज्याझ्वः क्यना वयाच्वंगुलिइ आः वयाः लोप जुया वनाच्वंगु आः वयाः हाकनं थुगु परम्परायात निरन्तरता बीगु कुतः जूगुलिं सफताया कामना यानादिल ।

पाहांकथं झायादीम्ह यल महानगरपालिका १६ वडाअध्यक्ष निर्मलरत्न शाक्यं थुकथंया महत्वपूर्ण ज्याझ्वःया निंतिं स्थानीय तहया भूमिका सकारात्मक दइ धासें थम्हं नं फक्व ग्वाहालि यायेगु बचं बियादिल ।

झीगु सःया प्रमुख राजुराजदेव वज्राचार्यं लसकुस यासें प्रेस विज्ञप्ती ब्वनाः न्यंकादीगु खःसा सुकुन्दा फिल्म्सया वासु शाहीं सुभाय् देछनादीगु खः ।