मानन्धर संघया थीथी कासा
येँ(नेपालभाषा टाइम्स)- केन्द्रीय मानन्धर संघया ग्वसालय् वंगु माघ १४ गते शनिवाः अतिरिक्त क्रियाकलाप अन्तर्गत थीथी कासा जुल । संघया ७९ क्वःगु स्थापना दिवसया लसताय् थनया सामाखुसिइ च्वंगु आशिर्वाद कलेजय् वार्षिक खेलकुद प्रतियोगिता अन्तर्गत चेस( मिसा व मिजं), टेबुल टेनिस (मिसा व मिजं), खुदँ क्वय्या मस्तय् दथुइ मचा ब्वाज्या व १५ दँ तकया मस्तय् दथुइ धाः बाजं धेंधेंबल्लाः कासा जूगु खः ।
कासाय् टेबुल टेनिस (मिजं)पाखे उज्जवल मानन्धर (तंलाछि) न्हाप, सार्थक मानन्धर (चस्वांद्वँ) लिउ व राजेश मानन्धर (दैसाः) लियांलिउ लाःगु खः । अथे हे टेबुल टेनिस (मिसापाखे) प्रितिका मानन्धर (चस्वांद्वँ), ईशा मानन्धर (भिंद्यः गुथि) व पलिसा मानन्धर (भिंद्यः गुथि) छसिकथं न्हाप, लिउ व लियांलिउ लाःगु दु । मचा ब्वाज्या कासाय् सम्यक मानन्धर (साःक्वलान त्वाः ख्वप) न्हाप, आर्शिया मानन्धर (तंलाछि) लिउ व रियाज मानन्धर (पाक्व पुखूद्यां) लियांलिउ लाःगु दु ।
चेसय् मिजंपाखे निराजन मानन्धर (तःखाछेँ खलः) न्हाप, सुरेश मानन्धर (तंलाछि)लिउ व मनिष मानन्धर (भिंद्यः गुथि) लियांलिउ लाःगु दुसा मिसापाखे श्वेता मानन्धर (तंलाछि) न्हाप, स्वस्ति मानन्धर (तंलाछि) लिउ लायेत ताःलाःगु दु ।
धाःबाजंपाखे थँहितिया लुमिला मानन्धर न्हाप व थँहितिया हे लुँस्वां मानन्धर लिउ लायेत ताःलाःगु दुसा ९ दँ दुम्ह सम्मुनत मानन्धरं हःपाः सिरपाः त्याकेत ताःलाःगु दु ।
संघया ग्वसालय् मानन्धर ल्याय्म्ह पुचःया संयोजनाय् जूगु अतिरिक्त क्रियाकलाप अन्तर्गत चेस, टेबुल टेनिस व मचा ब्वाज्या दक्षिण एशियाया कीर्तिमान धावकनापं संघपाखें प्रबुद्ध व्यक्तिकथं सम्मानित बैकुण्ठ मानन्धरं स्वनादीगु कोषपाखें जूगु खःसा धाःबाजं शम्भुमान (काकाभाइ) बसुन्धरा लुमन्ति कोषपाखें जूगु खः ।
विजयी कासामिपिंत वइगु फागुनय् जुइगु स्वयम्भू भ्वजय् छगू ज्याझ्वःया दथुइ सिरपाः लःल्हायेगु संघं जानकारी बिउगु दु । थ्व हे झ्वलय् संघया ग्वसालय् वइगु चैत महिनाय् नौबाजं सम्मेलन यायेत्यंगु दु ।
LEAVE YOUR COMMENTS