ख्वपय् सापारु, किपुली बाघ भैरव जात्रा स्थगित

येँ- ख्वपय् तःजिक न्यायेकीगु सापारु थुगुसी नं औपचारिकताय् जक सीमित यानाः न्यायेकीगु जूगु दु । अप्वयाच्वंगु कोरोना महामारीयात ध्यानय् तयाः ख्वप नगरपालिकां थ्व निर्णय याःगु खः ।

ख्वप नपाया प्रमुख सुनिल प्रजापतिं संक्रमणया जोखिम कायम हे दुगु धासें घिन्ताङघिसि व सांस्कृतिक प्रदर्शनी मयायेत सकसितं इनाप यानादीगु दु । म्हिगः ख्वपया फुक्कं वडाया सांस्कृतिक गुरु, सांस्कृतिक प्रतिनिधि व जनप्रतिनिधि सहितया बैठकं सापारु कुन्हु ताहासा चाःहीकेत छगू पुचलय् अप्वलय् नीम्ह च्वनेगु खँ क्वःछिउगु खः ।

सहलहया झ्वलय् नगरप्रमुख प्रजापतिं धयादिल, ‘अप्वः भीड मुनीगु जात्रा पर्वय् संक्रमण न्यना वनीगु खतरा दयाच्वनी, कोभिडयात हेलचक्राइ यायेगु मखुसें सतर्कता नालाः बुकेमाः ।’

सहलहया झ्वलय् जात्रालिसे सम्बन्धित सांस्कृतिक गुरु व सांस्कृतिक पुचःया प्रतिनिधिपिंसं कोरोना जोखिम यथावत दुगुलिं थुगु दँया सापारुयात नं थगुने थें औपचारिकताय् लिकुंके माःगु, सापारु चाःहिलीगु लँपुइ माःगु सरसफाई यायेगु, भीड मुनी कथं गुगुं नं सांस्कृतिक प्रदर्शनी मयायेगु सुझाव बियादीगु खः ।

अथेहे किपूया बाघ भैरव जात्रा नं स्थगित जूगु दु । अप्वयाच्वंगु कोरोना संक्रमणया कारणं थ्वहे भदौ १ गते न्यायेकेमाःगु थ्व जात्रा स्थगित यायेगु निर्णय जूगु खः । जात्रा स्थगित जूसां जात्राय् यायेमाःगु विधि पूवंकेगु लिसें द्यः पाःलाः हिलाबुला यायेगु ज्या धाःसा क्वचायेकेगु सहमति जूगु खँ सीदुगु दु । थगुने नं कोरोनाया कारणं बाघ भैरव जात्रा स्थगित यायेमाःगु खः ।