ने. सं. ११४४ ञलाथ्व नवमी -

छिनफान जुइ माल !

थौंकन्हय् । बजारय् । नेकपा दुने प्रम ओली व अध्यक्ष प्रचण्ड दथुइ जुयाच्वंगु वार्तायात अमेरिकी राष्ट्रपति ट्रम्प व उत्तर कोरियाया राष्ट्रपति उन दथुइ जूगु वार्तालिसे लना हयाच्वंगु दु। खतुं प्रम ओली व अध्यक्ष प्रचण्ड निम्हं छगू हे दलया खः । निम्हं उतिकं हे जाःपिं । नेकपा थौंकन्हय् विश्वय् हे नमूना कम्युनिष्ट सत्ताधारी पार्टी खः । नेकपा दलया सम्पूर्ण नेता कार्यकर्तातसें छप्वाः म्हुतुं दावा याइ । देशय् दुगु बुर्जुवा पार्टीतय्त छ्वावानाः शानदार जनमत हयागु गर्व नं याइ । तर छखेर थज्याःगु दावा, गर्व याःसां व हे नेकपा दुने अग्रपंक्तिया नेतात दथुइ शत्रुवत विमति नं खनेदइ । छम्हं मेम्हेसित सिधयेकेगु द्वन्द्वय् व्यस्त जुइ । लां लां दयेधुंकल सहमतिया निंतिं वार्ता जुयाच्वंगु । वार्ता पिने क्यनेगु औपचारिकता जक जुइ । दुने दुनें थःथःगु स्वार्थया तकराव यथावत जुइ । खँल्हाबल्हात हावादारी सिद्ध जुइ । निम्ह नेता दथुइ जुयाच्वंगु ख्यें मथ्वइगु वार्तां नेकपा सही अर्थय् छगू हे दल जुइधुंकूगु खः ला धइगु खँय् आम जनताय् शंका लुइ ।

छखें धाइ नेकपा विभाजन जुइ मजिउ, कुचा दले मजिउ। देय्या निंतिं अहित जुइ । देय् तःधंगु दुर्घटनाय् लाइ । पार्टीया नेता-कार्यकर्ता सकसिनं एकताया मन्त्र थ्वयेका जुइ । नेकपा पार्टी गुगुं हालतय् नं कुचा दले मजिउ। तर एकताया मन्त्र जपे यानाः क्यनीपिं नेतातय् दुने दुनें थःथःगु स्वार्थ सिद्धि प्रमुख अभिष्ट जुयाबी । गथे यानाः शक्तिइ वयेगु, मात्र मूल उद्देश्य जुइ । देय् व जनताया स्वार्थ इमित गौण जुइ । थौं नेकपा दुने प्रम ओली व अध्यक्ष प्रचण्ड दथुइ जुयाच्वंगु खिचातानी निगू बेमेल राष्ट्रया नेतातय् दथुया वार्ता थें जुयाच्वंगु खनेदु ।

देय् लां लां दयेधुंकल लकडाउनय् लायेधुंकूगु दु। नकतिनि नकतिनि देशय् लकडाउन जूबलय्, देशय् कोरोना संक्रमित निम्ह प्यम्ह हे जक दुगु ई । अबलय् टि.भी. कार्यक्रमय् छम्ह कथित नेतां धाइ, ‘देशय् ओली सरकार कोरोना नियन्त्रण यायेत शानदार सफल जूगु दु। विश्वया विकसित देय्त नं कोरोना प्रकोपं ग्रस्त जूगु इलय् नं ओली सरकारं देय्यात कोरोनां बचे यात । उकिं ओलीयात नोबेल पुरस्का बीमाः । सम्बन्धित सरोकारवालां देय् समक्ष थुकिया निंतिं पहल यायेमाः । अबलय् विशेष कुतलं छुं जुइमखु। खास देशय् प्रकोप व हे मवःनि । तर ओली सरकारं कोरोना नियन्त्रण यायेगु खँय् प्राप्त याःगु विश्वय् ज्वःमदुगु सफलताया निंतिं नोबेल पुरस्कार बीमाः ।’ थथे धाइपिं नेतात नं पिहां वल । थौं देय्या हविगतं क्यनी सरकारया वास्तविक सफलता !

देशय् दुगु बुर्जुवा पार्टीतय्त छ्वावानाः शानदार जनमत हयागु गर्व नं याइ । तर छखेर थज्याःगु दावा, गर्व याःसां व हे नेकपा दुने अग्रपंक्तिया नेतात दथुइ शत्रुवत विमति नं खनेदइ । छम्हं मेम्हेसित सिधयेकेगु द्वन्द्वय् व्यस्त जुइ ।

लकडाउनया इलय् । नेतात थःथःगु स्वार्थान्ध जुयाः क्वमचाइगु वार्ताय् संलग्न जुल । नेता, जनता दक्वं छप्पँछधी जुयाः देशय् वःगु महामारीलिसे ल्वाय् माःबलय् सत्तासिन दलया नेतात अहंकारया द्वन्द्व फसे जुल । आम मनूत दक्व छेँय् छेँय् बन्दी । सकलें प्रकोपपाखें त्रसित, चिन्तित । भविष्यय् गज्याःगु दुर्दिन वइगु खः? आर्थिक, सामाजिक, मनोवैज्ञानिक हरेक दृष्टिं सम्पूर्ण जनता न्हियान्हिथं ग्लानी जुजुं वनाच्वन । तर दुर्भाग्य ! तर देय्, जनतायात धाःसा हरेक दृष्टिं ढादस बियाः जनताया सुरक्षा, संरक्षणया अनुभूति बीगु जिम्मेवारी कयाच्वंपिं शासक दलया नेतात मात्र शक्ति प्राप्तिया कलहसं ब्यस्त ।

देशय् दुगु पार्टीत बल्लायेमाः । इमिके एकता दयेमाः । दलतय् एकतां बीगु सरकार जरुर बल्लाइ । एकतावद्ध शक्तिशाली दलया सरकारं देय्या निविघ्न रुपं उन्नति, विकासया लँय् न्ह्यःने न्ह्याके फइ । तर दलतय् एकता नां जकया कृत्रिम जुइ मजिउ । दलया एकता प्राकृतिक जुइमाः, ‘अग्र्यानिक’ । इन्जेक्सन बियाः, सोलुसन तिकाः, गुँड इलाः स्वानातःगु एकता जुइ मजिउ । एकता नेतातय् थःथःगु हैसियत रक्षाया निंतिं जक जुइ मजिउ । थौं नेकपाय् पिनें एकताया कयाः जय गान याइपिं गाक्कं दयाः नं सही अर्थय् छधी जूगु खँय् विश्वास मयाइपिं नं दु। दलया एकताया आधार सैद्धान्तिक जुइ ।

जुइमाः । सिद्धान्तया स्पष्टतां जक दलया कार्यकर्ता, नेतृत्वय वर्गयात सही मार्ग निर्देशन याइ । दलया नेतृत्वपंक्तिं शक्ति हडपे यायेगु खँय् जक अर्जुनदृष्टि तये मजिउ । जनतया हित, कल्याणपाखे समर्पित जुइमाः । सैद्धान्तिक सहमति मदयेक मात्र नेतातय्सं कुर्सि थःगु यायेगु लक्ष्य तयाः दलतय्सं सतही एकता याना वनेगु खःसा, देशय् विकास सम्भव जुइमखु। एकताया नामय् दलत ल्वाल्वां हे ई बर्बाद जुइ । नेकपाया एकता, एकता खः मखु? राजनैतिक वृत्तय् न्ह्यसः दनाच्वंगु दु। खः मखु, याकनं छिनफान जुइमाल । देय् व जनताया निंतिं !