‘कोरोना नियन्त्रणय् ध्यबाया अभाव जुइकेबी मखु’

येँ (रासस) – बागमति प्रदेशया मुख्यमन्त्री डोरमणि पौडेलं कोरोना नियन्त्रणया निंतिं ज्या यायेत ध्यबाया अभाब मजुइगु खँ धयादीगु दु। सोमवाः हेटौंडाय् कोभिड संकट व्यवस्थापन समितिया बैठकय् मातहतया निकाययात निर्देशन बिसें मुख्यमन्त्री पौडेलं न्ह्यःने च्वनाः ज्या याइपिं स्वास्थ्यकर्मी, सुरक्षाकर्मीयात नं संक्रमण जुया वःगुलिं कोरोना नियन्त्रण व रोकथामया निंतिं गम्भीर जुइमाःगु ई वःगु खँ धयादिल ।

मुख्यमन्त्री पौडेलं प्रदेशय् कोरोनाया कारणं जटिल अवस्था वयेफुगुलिं तसकं सजग जुइमाःगु बिचाः तयादिल । वय्कलं कोरोना नियन्त्रणया लागि सकस्यां थःथःगु थासं भूमिका निर्वाह यायेमाःगु खँ धयादीगु दु। पौडेलं अत्यावश्यक सामग्री बाहेकया ढुवानी व पैठारी पनेगु निंतिं थाय् व अवस्था स्वयां निषेधाज्ञा व लकडाउन यायेमाःगु खँ धयादीगु दु ।

प्रदेशया आन्तरिक मामिला तथा कानुनमन्त्री शालिकराम जम्कट्टेल, उद्योग पर्यटन वन तथा वातावरण मन्त्री अरुण नेपाल, मुख्यमन्त्रीया प्रमुख राजनीतिक सल्लाहकार जेएन थपलिया, जिल्ला समन्वय समितिय मकवानपुरया प्रमुख रघुनाथ खनाल, प्रदेश प्रमुख सचिव डा. मानबहादुर विश्वकर्मापिं सहभागी जुयादीगु बैठकं कोरोना नियन्त्रणया निंतिं प्देश सरकारं अवलम्बन यायेमाःगु नीति बारे सहलह याःगु खः ।