डल्लु आवासयात नमूना आवास दयेकेत पहल
येँ- थनया डल्लु आवास क्षेत्रयात सुविधायुक्त नमूना आवास दयेकेगु निंतिं पहल शुरु जूगु दु । उकिया निंतिं डल्लु आवास स्थानीय सहयोग समितिं छगू कार्यपत्र दयेकाः विकासया निंतिं थीथी ज्याझ्वःत न्ह्याका वयाच्वंगु दु । स्थानीय तह, प्रदेश व प्रतिनिधिसभा निर्वाचन लिपा डल्लु आवास क्षेत्रयात विकास यायेगु ल्याखं समितिं उकथंया ज्याझ्वः धमाधम न्ह्याका वयाच्वंगु खः । थ्व झ्वलय् समितिं डल्लु आवास विकासयात अझ सशक्त रुपं न्ह्यःने यंकेत प्रतिनिधिसभा व स्थानीय तहया जनप्रतिनिधिलिसे नं निरन्तर रुपं सहलह याना वयाच्वंगु दु ।
थौंकन्हय् उगु लागाय् अन्तर्राष्ट्रियस्तरया मल्टिप्रपोज भवन, आवश्यककथंया लँपुया जिर्णोद्वार यायेगु, लःया निंतिं डिप बोरिङ यायेगु नापं पार्क निर्माण यायेगु योजना न्ह्याकेगु तयारी जुयाच्वंगु समितिया अध्यक्ष राजा शाक्यं कनादिल । थुपिं दक्वं योजनात समितिया कार्यपत्रय् न्ह्यथनाकथं ज्या यायेत निरीक्षण यायेगु ज्या जुयाच्वंगु नं वय्कलं धयादिल । समितिया अध्यक्ष शाक्यया हे पहलय् प्रतिनिधिसभा सदस्य जीवनराम श्रेष्ठ, रेञ्जर रेजिमेन्टया रेजिमेन्टपति महासेनानी अनुपजंग थापा, वडाअध्यक्ष ईश्वरमान डंगोल लगायत उगु क्षेत्रया प्रबुद्ध व्यक्तित्वपिंसं डल्लु आवास क्षेत्रया निरीक्षण यानादीगु दु ।
महासेनानी थापां आवास क्षेत्रया निरीक्षण लिपा धाथें हे व्यवस्थित डल्लु आवास लागा नमूना आवास क्षेत्रया रुपय् विकास जुया वनाच्वंगु धासें समितिया ज्यायात कयाः प्रशंसा यानादिल । अथे हे प्रतिनिधिसभा सदस्य श्रेष्ठं आवास क्षेत्रय् दयेकेत्यंगु अन्तर्राष्ट्रिय बहुउद्देश्यीय भवन आवास क्षेत्रया हे नमूना आवास क्षेत्र जुइगु खँय् निगू मत दइमखु धासें उकिं आवास क्षेत्रया विकासया निंतिं अझ तःधंगु उपलब्धि जुइगु विश्वास प्वंकादिल ।
LEAVE YOUR COMMENTS