रक्तदाता समाज २३ वडा कमिटीया हिदान

येँ (नेपालभाषा टाइम्स) – नेपाल स्वयंसेवी रक्तदाता समाज २३ वडा कमिटीया ग्वसालय् हिदान ज्याझ्वः जुल । हालय् जक गठन जूगु समाजया वडा कमिटीपाखें सार्वजनिक परिचयात्मक व हिदान ज्याझ्वः याःगु खः ।

येँ महानगरपालिकाया प्रमुख विद्यासुन्दर शाक्यया प्रमुख आतिथ्यताय् समाजया केन्द्रीय नायः प्रेमसागर कर्माचार्य विशेष आतिथ्यताय् बसन्तपू दबुलिइ उगु हिदान ज्याझ्वः जूगु खः । हिदान ज्याझ्वलय् येँ मनपा हनुमानध्वाखा दरवार क्षेत्र संरक्षण कार्यक्रम प्रमुख रोशन शाक्य, महानगरीय प्रहरी वृत्त जनसेवाया प्रमुख प्रहरी नायब उपरीक्षक सुनिलजंग शाह, समाजया १९ व २० वडा कमिटीया अध्यक्ष विनोद खड्गी, राम रंजित, २० वडा सचिव राजेश मानन्धर पाहांकथं ब्वति कयादीगु खः ।

मुक्कं न्यय्खुम्हेसिनं हिदान यानादीगु ज्याझ्वलय् नवगठित २३ वडा कमिटीया पदाधिकारी दुजःपिंत मूपाहां येँ मनपा प्रमुख शाक्यं खादा न्ययेकाः व विशेष पाहां कर्माचार्यं दसिपौ लःल्हानादीगु खः । ज्याझ्वः वडा कमिटीया नायः राजेशलाल श्रेष्ठया सभापतित्वय् जूगु खः ।