लोकसेवा विज्ञापन संघीयता विरोधी
जनतायात दयेधुंकूगु अधिकार लित यंकूगु द्वपं
येँ – समाजवादी पार्टी नेपालया सहअध्यक्ष राजेन्द्र श्रेष्ठं लोकसेवा आयोगं पदपूर्तिया निंतिं पिथंगु विज्ञापन प्रतिगामी जूगु द्वपं बियादीगु दु । धनगढी वय्कलं थ्व खँ कनादीगु खः ।समानुपातिक समावेशी व्यवस्थाया सन्दर्भय् संविधानया धारा ४२ या उपधारा १ व निजामति सेवा सम्बन्धी प्रचलित कानुन अःखः लोकसेवा आयोगं वंगु जेठ १५ गते पिथंगु विज्ञापन प्रतिगामी जूगुलिं खारेज जुइमाःगु खँ नं वय्कलं धयादीगु दु ।
वय्कलं आयोगयात संविधान अःखः विज्ञापन यायेगु अधिकार मदु धासें संविधानया धारा २४४ स संघ व प्रदेश निगू तहलय् लोकसेवा आयोगया व्यवस्था यानातःगु व धारा २२७ सं गाउँपालिका व नगरपालिकाया कर्मचारी भर्ना सम्बन्धी व्यवस्था प्रदेश कानुन कथं जुइगु प्रष्ट व्यवस्था यानातःगुलिं कर्मचारी समायोजन ऐनया दफा १२ या आधारय् लोक सेवा आयोगया विज्ञापन असंवैधानिक जूगु खँ नं वय्कलं कनादिल ।
वय्कलं नेपालय् संघीयता, समानुपातिक व समावेशिता माःगु मू कारण हे वहिष्करणय् लाःपिं आदिवासी जनजाति, मधेशी, खस, शिल्पी, थारु, मुस्लिम, अल्पसंख्यक व सीमान्तकृत समुदाययात मूल धारय् हयेगु निंतिं खः धयादिल ।
थ्वहे झ्वलय् म्हिगः प्रतिनिधिसभाया शून्य समयय् सांसदपिंसं नं आयोगं खुला याःगु कर्मचारी सम्बन्धी विधेयकयात कयाः आलोचना यासें उगु विज्ञापन खारेज यायेमाःगु माग याःगु दु । विज्ञापन समानुपातिक व समावेशी मजूगु धासें उकियात खारेज यायेमाः धाःगु खः ।
गुथि विधेयक विरुद्ध गोष्ठी
येँ – भूमि व्यवस्था, सहकारी तथा गरिबी निवारण मन्त्रालयं हःगु गुथि सम्बन्धी विधेयकयात कयाः नेवाः राष्ट्रिय परिषद नेपालं बिचाः गोष्ठी याइगु जूगु दु । वइगु सोमवाः नेपाः बैक्वटय् गुथि ‘विधेयक व नेवाः सरोकार’ विषयस बिचाः गोष्ठी यायेत्यंगु खः । गोष्ठिइ संघीय समाजवादी पार्टीया सहअध्यक्ष राजेन्द्र श्रेष्ठ लगायत थीथी विज्ञतय्सं न्ववानादी ।
थ्वहे गुथि विधेयकयात कयाः थौं नेवाः राजनीतिक अभियानपाखें नेपाः ब्यांक्वेटय् नं छगू गोष्ठी जुइत्यंगु दु । थ्व विधेयकयात कयाः आः थीथी नेवाः खलः पुचःतय्सं सतकय् वयाः आन्दोलन यायेगु तयारी यानाच्वंगु खँ नं सीदुगु दु ।
LEAVE YOUR COMMENTS