प्रधानन्यायाधीशपाखें हे स्यायेगु धम्की !

प्रधानन्यायाधीश गोपाल पराजुलीं स्याःगु धम्की बिल धकाः वरिष्ठ अधिवक्ता डा. सुरेन्द्र भण्डारीं थःगु सुरक्षाया माग यासें जिल्ला प्रशासन कार्यालयय् निवेदन बिउगु दु । प्रधानन्यायाधीश थःम्हं हे निक्वः तक फोन यानाः स्यायेगु धम्की बिउगु व मंगलवाः छुं मनूतय् थःगु छेँय् वयाः नं धम्की बिउगु खँ भण्डारीं थःगु निवेदनय् धयातःगु दु ।

भण्डारीं सर्वोच्च अदालतय् जूगु छगू बहस लिपा वंगु पुस २६ गते साढे ५ बजे पाखे फोन यानाः स्याःगु धम्की बिउगु, थ्व धुंकाः वंगु बिहिवाः नागरिक पत्रिकाय् थःगु छपु लेख पिहां वयेधुंकाः उकुन्हु सुथय् साढे ९ बजे पाखे फोन यानाः धम्की बिउगु खँ निवेदनय् न्ह्यथनातःगु दु । भण्डारीं मंगलवाः नं छथ्वः मनूत थःगु छेँय् हे वयाः धम्की बिउलिं निवेदन बियागु खँ धाःगु दु ।

भण्डारीया निवेदन बिइगु निंतिं अधिवक्ता ओमप्रकाश मिश्र नं जिल्ला प्रशासन कायालयं वंगु खः । उगु निवेदनय् प्रधानन्यायाधीशपाखें हे थःगु ज्यान खतरा दुगु धासें थःगु सुरक्षा यानाबीत व थःत छुं जुल धाःसा प्रधानन्यायाधीश पराजुली विरुद्ध कानुनी कारवाही यायेत इनाप यानातःगु दु ।