थौं नृसिंह जात्रा
यल (नेपालभाषा टाइम्स)÷ यलया राजोपाध्याय देव व्राम्हणतय् उपाकर्म गुथिपाखें न्ह्याका वयाच्वंगु नृसिंह जात्रा थौं पिदनेत्यंगु दु । दँय्दसं गुंलागा पञ्चमि कुन्हु पिदनीगु नृसिंह जात्रा थौं न्हिनसिया १२ बजे पूर्णचण्डीं पिहां वयाः देय् चाःहिली ।
उपाकर्मया गुथिया गुथियारपिंसं पाः फयाः न्ह्याकीगु थुगु जात्रा थुगुसी मदुम्ह नृपेन्द्रराज शर्माया पाः लाःगु दु । थुगुसी राजीव राजोपाध्याय् नृसिंह जुइगु खँ धाःगु दु । थुगु जात्राय् पाःलाःम्हेसिया जिलाजं नृसिंह जुइमाःगु परम्परा दु ।
पूर्णचण्डीं सुरुजुइगु जात्रा गाःबहाः, प्यंगःथां, पिम्बहाः, बालिफः, नकबही, क्वालखु, झटापोल, क्वन्ति, क्वबहाः, स्वथ, मंगलबजाः, हःखा, लुँहिति, ओकुबहाः, थैना, चक्रबही, टंगः, तिछुँगल्ली, इखालखु, जेनबहाः, वला जुयाः पूर्णचण्डी हे थ्यंकाः क्वचायेकी ।
LEAVE YOUR COMMENTS