ने. सं. ११४६ बछलाथ्व चौथी - बुंगद्यः सालिगु

यलय् कोरोनाया हुनिं लानाच्वंगु लिच्वःया विषययात कयाः सहलह ज्याझ्वः

यल (नेपालभाषा टाइम्स) – विश्वव्यापि महामारीया रुपय् न्यंकभनं ब्वलनाच्वंगु कोरोनाया कारणं स्वनिगलय् लानाच्वंगु लिच्वःया विषयस यलय् सहलह जूगु दु ।

यलया मंगलबजारय् म्हीग शनिवाः नेवाः ग्वाहालि पुचः हःखाःया ग्वसालय् जूगु ‘कोरोनाया खसुइ तनाच्वंगु स्वनिगः’ शिर्षकया ज्याझ्वलय् मू वक्ता सामाजिक अभियन्ता एवं विकासविज्ञ अनिल चित्रकारं मनूतय्सं प्रकृतिइ याःगु अतिक्रमणया परिणाम स्वरुप हे थथे थीथी भाइरसया प्रकोप अप्वयाः वःगु खः धकाः धयादिल ।

वरिष्ठ साहित्यकार एवं समाजसेवी व हलिं नेवाः दबू नेपाः च्याप्टरया नायः शाक्य सुरेनं सञ्चालन यानादीगु उगु ज्याझ्वलय् भौतिक दूरी कायम जुइकथं फ्यतुइगु थाय् तःगु खःसा सकसितं मास्क व स्यानिटाइजर नं बिउगु खः । ज्याझ्वलय् खलःया नायः विक्रम शाक्य, इनफ इज इनफ अभियानया अभियन्ता विनोद शाही, नेवाः राजनीतिक अभियानया पुलांम्ह नायः रबिन्द्र श्रेष्ठ, साहित्यकार अर्थविद् एवं राजनैतिक विश्लेषक डा. पुष्पराज राजकर्णिकार, साहित्यकार एवं समाजसेवी कुमुद श्रेष्ठ लगायतं थःथःगु बिचाः प्वंकादीगु खः ।