शासकतय् सलगः तःधं कि जनताया विहार तःधं ?

येँ (नेपालभाषा टाइम्स) – येँ मनपा २१ वडाय् लाःगु लगं त्वालय् पुलांगु बौद्ध विहार थुनाः थापा परिवारं लिपा दयेकूगु छेँ व सलगः (तबेला) हानं कायम यायेमाः धकाः जुयाच्वंगु कुतःयात स्थानीय जनतां विरोध याःगु दु ।

अन्तिम मल्ल जुजु जयप्रकाश मल्लं निर्माण याःगु धइगु इतिहास हे दुगु उगु थासय् थनिं निसःदँ न्ह्यः माथवरसिंह थापापिं शक्तिइ वःबलय् विहार नष्ट यानाः थःपिनि निजी प्रयोजनया लागिं छेँ व सलगः दयेकूगु खः । थापा शक्तिया पतन लिपा उगु थासय् सेनाया पुलांगु ल्वाभः तयातःगु खःसा ल्वाभः तइगु थाय् जूगुलिं उकियात शिलखाना धायेगु याना हःगु खः ।

०७२ सालया तःभुखाचय् उगु शिलखाना भवन पाःताः जुइक दुना वयेवं अन येँ महानगरपालिकां पुलांगु विहार सी दयेक चैत व माथवरसिंह थापाया अवशेष सी दयेक छगू संग्रहालय समेत तयाः ‘लगं पार्क’ दयेकेगु तयारी याःगु खः । थ्वहे दथुइ थापातय् परिवारं अन पार्क मखु, शिलखाना हे कायम जुइमाः धइगु जिकिर यासें रिट तःगु खःसा उगु रिटं यानाः अन पार्क निर्माण रोके जूगु दु ।

थ्वहे झ्वलय् अनया स्थानीय वासिन्दातय्सं उगु थासय् थापातय् छेँ व सलगः दयेके न्ह्यः ऐतिहासिक विहार दुगु जुयाः इतिहास व पुरातात्विक ल्याखं थापातय् सलगः तःधं लाकि स्थानीय जनताया बौद्ध विहार तःधं धकाः न्ह्यसः तयाहःगु दु। येँया थीथी थासय् सम्पदा बचे यायेत सक्रिय जुयाच्वंपिं सम्पदाप्रेमितय्सं थुकिया बारे सः तयेमाःगु खः लाकि मखु धकाः नं उमिसं न्ह्यसः तयाहःगु दु ।

स्वनिगःया सम्पदा बचे यायेमाः धकाः थाय्थासय् मुद्दा तया जुइम्ह अधिवक्ता संजय अधिकारी समेत अन विहार नष्ट यानाः शिलखाना कायम यायेमाः धइगु मुद्दाया पक्षधर खः । उगु थासय् थापातय्सं थःगु निजी छेँ व सलगः दयेकूबलय् नष्ट याना छ्वःगु ऐतिहासिक विहारया अवशेष व थ्व सम्बन्धी शिलालेख तकं अन हे सुरक्षित जुयाच्वंगु दनि ।