ख्वनाया सिकाली द्यः बचे याइगु
फास्ट ट्राय्कया नक्साय् सामान्य हिउपाः
येँ – राष्ट्रिय गौरवया आयोजना कथं कयातःगु येँ–तराई द्रुतमार्ग (फास्ट ट्राय्क) दयेकेगु झ्वलय् सिकाली देगः बचे यायेगु कथं न्हापा दयेकातःगु नक्साय् छुं भचा हिउपाः हयेगु तयारी जुयाच्वंगु खँ धाःगु दु । म्हिगः द्रुतमार्ग दयेकेगु निंतिं रक्षा मन्त्रालयय् मन्त्री सहित च्वंगु बैठकं उगु निर्णय याःगु खः । लिसें सहलहया झ्वलय् अन स्थानीय जनतायात बीगु मुआब्जा बारे पुनरावलोकन यायेगु खँ नं जूगु सीदुगु दु ।
यलया सैंबु, ख्वना व बुंगया क्षेत्रय् आयोजनाया निंतिं ८०० रोपनी जग्गा अधिकरण यायेमाःगु खःसा आः तक २५० रोपनी जग्गा अधिकरण यानाः मुआब्जा समेत इनेधुंकूगु दु । आयोजना दयेकेगु झ्वलय् थःपिं विस्थापित जुइ व लिसें मुआब्जाया ध्यबा नं मगाः धासें ख्वना व बुंगया स्थानीय जनतां आन्दोलन याना वयाच्वंगु खः ।
थ्वहे झ्वलय् ख्वनाय् तयेगु धकाः प्रस्तावित यानातःगु ड्राइपोर्ट आः अन मतसे मेथाय् यंकेगु खँ वयाच्वंगु सीदुगु दु । बुंगया स्थानीय वासिन्दा इन्द्रमान तुलाधरं ‘नेपालभाषा टाइम्स’ लिसें खँ ल्हासें ड्राइपोर्ट मेथाय् तयेगु धकाः तयारी जुयाच्वंगु जानकारी बयादिल ।
म्हिगः आयोजना व स्थानीय वासिन्दाया दथुइ जूगु सहलहया झ्वलय् ड्राइपोर्ट मेथाय् तयेगु कथं खँ जूगु जानकारी वय्कलं बियादिल । वय्कलं न्ह्यःने धयादी, ‘फिजिबिलिटी दत धाःसा ड्राइपोर्ट मेथाय् सरे जुइफु ।’ आः न्हूगु ड्राइपोर्ट कथं डुकुछापय् तये यंके फइगु सम्भावना अप्वःगु खँ धाःगु दु ।
वय्कलं म्हिगः जूगु सहलहया झ्वलय् ड्राइपोर्ट मेथाय् वन धाःसा आः अधिकरण याये धाःगु जग्गा उलिमछि अधिकरण यायेम्वाःलीगु जानकारी बियादीगु दु । लिसें वय्कलं न्हापा अधिकरण यायेधुंकूगु जग्गा नं स्थानीय जनतां लित माल धाल धाःसा जग्गा लित बीत नं आयोजना तयार दुगु खँ धाःगु दु । तर स्थानीय जनतां धाःसा लित बीगु खःसा फुक्कं जग्गा लित बीमाः धकाः माग यानाच्वंगु दु ।
फास्ट ट्राय्कया बिस्कं ऐन हइगु
येँ – येँ–तराई–मधेश द्रुतमार्ग दयेकेगु निंतिं बिस्कं ऐन हयेगु तयारी सरकारं याःगु दु । द्रुुतमार्ग दयेकेत खनेदुगु कानुनी व प्राविधिक समस्या समाधान यायेत रक्षा मन्त्रालयं आयोजना सम्बन्धी बिस्कं ऐनया मस्यौदा तयार याःगु खः । सिंहदरवारय् रक्षा मन्त्रालयया म्हिगः च्वंगु बैठकय् सरोकार दुगु मन्त्रालयया सचिव व निकायया प्रतिनिधि सहित रक्षामन्त्री ईश्वर पोखरेल दथुइ सहलह जूगु खः ।
सहलहया झ्वलय् मन्त्री पोखरेलं सामान्य विषयसं नं छगू निकायं मेगु निकाययात क्यनाः ज्यायात लिच्वः लाइगु स्थिति अन्त्य यायेत बिस्कं हे ऐन ‘सनसेक्ट एक्ट’ हयेगु जानकारी बियादीगु खः ।
LEAVE YOUR COMMENTS