कित्ताकाटं बाहिरी चक्रपथयात संकट

येँ – सरकारं स्वनिगलय् दयेके धाःगु बाहिरी रिङरोड आः दयेके मफइगु अवस्थाय् थ्यंगु खँ सीदुगु दु । बाहिरी चक्रपथ दयेकीगु आपालं थासय् भूमाफियां स्वंगू आना स्वयां म्हो जुइक जग्गा कुचा थलाः प्लटिङ याःगुलिं आः उगु आयोजना न्ह्याकेत थाकुइगु खँ धाःगु दु । बाहिरी चक्रपथ दयेकीगु अलाइन मेन्टय् अपार्टमेन्ट व चिचीकूगु जग्गा प्लटिङ यानातःगुलिं अन आः चक्रपथ दयेकेत समस्या वइगु खँ धाःगु दु ।

बाहिरी चक्रपथ दयेकेगु धकाः स्वदँ न्ह्यः प्रधानमन्त्री पुष्पकमल दाहालया पालय् जग्गा न्याये मीगु दिकाबिउगु खः । तर माःगु कानुन मदयेकूगुलिं भूमाफियातय्सं जग्गा चिचीकूगु प्लटिङ याना बीवं आः आयोजना दयेकेत समस्या ब्वलंगु खँ धाःगु दु । उगु लागाय् भूमाफियातय्सं ३००० हजार कित्ता जग्गा ३ आना स्वयां म्हो कित्ताकाट यानातःगु लूगु दु ।

यदि आः बाहिरी चक्रपथ दयेकेगु खःसा उकिया निंतिं हाकनं डीपीआर दयेकेमाःगु खँ आयोजनां धाःगु दु । आः अप्वः धइथें जग्गा ३ आना स्वयां म्हो जुइक कित्ताकाट याना तयेधुंकूगुलिं हाकनं ल्यान्डपुलिङ यायेबलय् अप्वः ध्यबा तुइगु जुयाः तत्काल ज्या मन्ह्याइगु जूगु खः ।
कानुनी संरचना तयार मयासे बाहिरी चक्रपथ दयेकेगु ज्या न्ह्याकूगुलिं समस्या ब्वलंगु खँ धाःगु दु । थुकिं जग्गाया दलाल व भूमाफियां जग्गाया भाः थकायेत तःधंगु भूमिका म्हितूगु खँ शहरी विकास मन्त्रालयं धाःगु दु ।

बाहिरी चक्रपथ दयेकेगु धकाः लगे जुयाच्वंगु उपत्यका विकास प्राधिकरणया पदाधिकारीतय्सं हे बाहिरी चक्रपथया जग्गा कित्ताकाटय् प्रमुख भूमिका म्हितूगु खँ सूत्रं धाःगु दु । उमिसं अन थः मनूतय्त दंक जग्गा न्याकाः आः थिकेगु भावं मीकेगु ज्या यानाच्वंगु खः ।

सम्बन्धित बुखँ

LEAVE YOUR COMMENTS