स्वनिगलय् थप ९२ म्ह संक्रमित

येँ (नेपालभाषा टाइम्स) – स्वनिगलय् कोरोना संक्रमित न्हियान्हिथं अप्वया वनेगु झ्वलय् आइतवाः नं थप ९२ म्हेसिके संक्रमण लूगु दु। आइतवाः न्हिछिया दुने नेपाःन्यंकं मुक्कं ३८० म्हेसिके संक्रमण खनेदुगु खःसा उकी २५ प्रतिशत धयाथें स्वनिगःयापिं जक लाःगु दु। आइतवाः संक्रमित खनेदुपिं मध्ये दकलय् अप्वः स्वनिगलय् खनेदुगु खः । स्वनिगःया येँय् ९० म्ह व यलय् २ म्हेसिके संक्रमण खनेदुगु खः । स्वनिगलय् जक आः सक्रिय संक्रमितत ९८४ म्ह दु। थुपिं मध्ये येँया ७९० म्ह, यलया १०५ म्ह व ख्वपया ५३ म्ह संक्रमितत अस्पतालय् उपचार यानाच्वंगु दु ।

म्हिगः थप संक्रमित जूपिं सहित नेपालय् आःतक कोरोना संक्रमित जूपिनि ल्याः २२ हजार ९७२ थ्यंगु दुसा कोरोनां सीपिनि ल्याः ७५ म्ह थ्यंगु दु। आइतवाः थप निम्हेसिया कोरोनां ज्यान वंगु खः । स्वास्थ्य मन्त्रालयया प्रवक्ता जागेश्वर गौतमया कथं शनिवाः स्वम्हेसिया ज्यान वंगु खःसा बिहिवाः व शुक्रवाः न्याम्ह न्याम्हेसिया ज्यान वंगु खः, अथहे आइतवाः निम्हेसिया ज्यान वंगु खः ।

आइतवाः सीपिं मध्ये छम्ह पोखरा महानगरपालिकाया वडा १९ या ६२ दँया मिजं खःसा मेम्ह पर्साया वीरगन्ज महानगरपालिका वडा २ या २० दँया मिसा खः । पोखराया ६२ दँया मिजंयात साउन १७ गते हे कोरोना पुष्टि जूगु खःसा वयात आइसीयुलय् तयाः उपचार यानाच्वंगु खः, अथेहे वीरगंजया मिसा धाःसा नारायणी अस्पतालय् थ्यंबलय् हे सीधुंकूम्ह खः ।

मेखे जुम्लाय् छम्ह खुला दुम्ह मिजं मचायाके हे संक्रमण खनेदुगु दुसा स्वम्ह नकतिनि मचा बुइकूपिं मिस्तय्के कोरोना खनेदुगु दु।