ने. सं. ११४४ कौलाथ्व पारू - नःलास्वनेगु

छाय् दना वन बालेन ?

येँ (नेपालभाषा टाइम्स)- येँ महानगरपालिकाया मेयर बालेन साह म्हीग जूगु उपत्यका मेयर फोरमया बैठकं अशोभनीय ढंगं दना वंगु घटनायात स्वनिगःया मेमेगु नगरपालिकाया मेयरतय्सं अस्वाभाविक तायेकूगु दु ।

मेयर फोरमया न्हापा न्हापा जुइगु छुं नं बैठकय् सहभागी मजुइम्ह मेयर साह म्हीग भुइजःसिइ जूगु बैठकय् धाःसा आकाझाकां उपस्थित जुयाः थःगु तं क्यना वंगु खः ।
बैठकय् खास यानाः स्वनिगःया फोहोर व्यवस्थापन यायेगु जिम्मा नेपवेस्ट धाःगु कम्पनीयात बीगु खँय् थःगु असहमति क्यँसें वय्कः दथुं दना वंगु खः । मेयर फोरमं स्वनिगःया फोहोर व्यवस्थापन यायेगु जिम्मा नेपवेस्टयात बीगु धकाः न्हापा निर्णय याःगु खःसां लिपा वयात मबीगु धकाः सहमति याःगु खः ।

तर म्हीगया बैठकय् थुकियात हानं एजेण्डा दयेकल धकाः वय्कलं तं क्यनादीगु खः । अन उपस्थित मेपिं मेयरतय्सं धाःकथं नेपवेस्टया खँ एजेण्डाय् छाय् वल धइगु खँ हे मसीक वय्कः दना वंगु खः । नेपवेस्टयात येँया फोहोर व्यवस्थापन याकेगु धकाः थ्व स्वयां न्ह्यः विद्यासुन्दर शाक्य मेयर जुयाच्वंगु पालय् हे सहमति जुयाच्वंगु खः । उकिया लागिं मेमेगु नगरपालिकातलिसे नं तःगू चरणय् खँ जूगु खः । तर येँया वर्तमान मेयरं नेपवेस्टयात ठेक्का मबीगु धकाः अडान काःगु कारणं वय्कःया रुचि मेगु कम्पनीपाखे दुगु खः लाकि धकाः शंका याना हःगु दु ।

नेपवेस्ट कम्पनीं स्वनिगःया फोहोर व्यवस्था याःगु वापत स्थानीय सरकारयात अःखतं कर समेत पुलेगु सहमति जुयाच्वंगु खँ धाःगु दु ।

येँया मेयरया मर्यादा न्हय्गू तह घटुवा
नेपाल सरकारं नकतिनि तयार याःगु राष्ट्रिय मर्यादाक्रमया धलखय् येँया मेयरया मर्यादाक्रम न्हापा स्वयां न्हय्गू तह घटे याना बिउगु दु । मेमेगु नगरया मेयर सिबें येँया मेयरया मर्यादायात विशेष स्थान बिसें न्हापा प्रदेश सरकारया मन्त्री सरह मर्यादाय् तयातःगु खः । आः उकियात घटे यानाः पूर्व मन्त्री सरह जक मर्यादा दइगु कथं कायम याःगु दु । येँ लगायत फुक्कं महानगरया मेयरया मर्यादायात आः समान यायेगु लागिं येँया मेयरया मर्यादा घटे याःगु खः ।