छगू लिपा मेगु धार्मिक द्वन्द्व
येँ (नेपालभाषा टाइम्स)- वंगु छुं ई न्ह्यवंनिसें देय्या थीथी थासय् हिन्दू अतिवादीतय्सं गनं इसाई व गनं मस्लिम समुदाय व गनं आदिवासी जनजातिया धार्मिक सांस्कृतिक ज्याखँ विरुद्ध अतिक्रमण याना हःगुुलिं धर्मया नामं छुं पुचलं देशय् अराजक अवस्था हयेत स्वयाच्वंगु खः लाकि धइगु आशंका जूगु दु ।
थ्व झ्वलय् सर्लाहीया मलंगवाय् छुं मनूतय्सं मुस्लिम समुदायया धार्मिक धरोहरय् आक्रमण यानाः धार्मिक दंगा ब्वलंकेत स्वःगु शंका जूगु दु । थुकिं यानाः मलंगवाय् कफ्र्यु हे तयेमाःगु अवस्था पिहां वःगु खः ।
थ्व खँयात कयाः मुस्लिम आयोगं म्हिगः छगू वक्तव्य हे पिकासें थज्याःगु ज्याखँतयय्सं समाजय् विद्यमान शान्ति खलबल याना बीफु धाःगु दु । समाजय् विद्यमान शान्ति खलबल यानाः अशान्ति ब्वलंकेत स्वयाच्वंपिं थज्याःपिं तत्वतय्त ज्वनाः कारवाही यायेमाःगु माग नं आयोगं याःगु दु ।
अन वंगु कृष्ण जन्माष्टमि कुन्हु कृष्णया मूर्ति विसर्जन यायेत्यंगु इलय् निगू पक्ष दथुइ ल्वापु जुयाः प्रशासनं कफ्र्यु हे तयेमाःगु खः ।
आः नकतिनि हे हिन्दूवादीतय्सं छगू नेपाली सिनेमायात नं विवाद यानाः प्रदर्शनय् रोक याना बिउगु दु । ‘एक भगवत गीता’ नां तयातःगु उगु फिल्मय् अनावश्यक विवाद पिकयाः प्रदर्शन पना बिउगु खः । लिपा हिन्दूवादी संस्था व फिल्म निर्माता दथुइ खँल्हाबल्हा जूबलय् फिल्मया नां हिलाः क्यने बीगु सहमति जूगु खः । आः फिल्मया नां ‘एक भगवत्, एक गीता (एक सामाजिक कथा)’ तयेगु सहमति जूगु खः ।
छुं ई न्ह्यः क्रिश्चियन धर्म प्रचार याः वःगु धइगु द्वपं बियाः जनकपुरय् निम्ह नेपाःमि इसाईतय्त ज्वनाः ख्वालय् हाखः पाकेगु ज्या याःगु खः । हिन्दू सम्राट महासंघ नांगु संस्थाया कार्यकर्तातय्सं अबलय् इसाई धर्मा–वलम्बीतय्त घेरे यानाः ‘जय श्री राम’ धा धकाः दबाब बिउगु खः ।व स्वयां न्ह्यः सायागु ला नःगु खँयात कयाः धरानय् ल्वापु जूगु खःसा अन जुइत्यंगु प्रदर्शनयात पना बिउगु खः । वहे प्रदर्शन आः येँय् यायेत्यंगु खँ सीदुगु दु ।
धार्मिक द्वन्द्व ब्वलंके मते – दाहाल
प्रधानमन्त्री लिसें नेकपा माओवादी केन्द्रया अध्यक्ष पुष्पकमल दाहालं जातीय व धार्मिक द्वन्द्व मन्यंकेत इनाप यानादीगु दु । म्हिगः समाजवादी मोर्चां हेटौंडाय् ग्वसाः ग्वःगु बागमती प्रदेशया सन्देशसभायात सम्बोधन यासें प्रधानमन्त्री दाहालं उगु खँ धयादीगु खः । लिसें वय्कलं जनयुद्धय् जातीय व धार्मिक द्वन्द्व गनं नं मजूगु धासें अज्याःगु ज्याय् दुमथ्यायेत इनाप यासें अज्याःगु जातीय व धार्मिक द्वन्द्व जुइके मबीगु खँ नं धयादीगु दु ।
वय्कलं जनयुद्धया झ्वलय् संघीयता व समावेशीताया पक्षय् ल्वायेत मोर्चा गठन जूगु धासें सरकारं भ्रष्टाचार विरुद्ध सुशासन, सामाजिक न्यायया अभियान न्ह्याकेवं प्यखेरं आक्रमण शुरु जूगु खँ नं धयादीगु दु । थौंकन्हय् थीथी थासय् जुयाच्वंगु धार्मिक कचवंयात ध्यानय् तयाः प्रम दाहालं उगु खँ धयादीगु खः ।
LEAVE YOUR COMMENTS