टेकु, महाबौद्ध एरिया सिल याइगु, आः तुरुन्त लकडाउन मयाइगु

येँ – येँया प्रमुख जिल्ला अधिकारी (सिडिओ) जनकराज दाहालं येँया महाबौद्ध, टेकु लागा सिल यायेगु खँ धयादीगु दु । थौं येँ, यल व ख्वप जिल्लाया सिडिओतय् मंकाः बैठक लिपा दाहालं येँया महाबौद्ध, टेकु लागा सिल यायेगु खँ धयादीगु खः । उगु बैठकय् गन गन कोरोनाया संक्रमण अप्वः खनेदु, अन अन सिल यायेगु क्वःछिउगु खः । थ्व हे निर्णय कथं आः कोरोनाया संक्रमितत अप्वः खनेदुगु महाबौद्ध व टेकु लागा सिल यायेगु खँ धयादीगु खः ।

बैठकं आः तुरुन्त हे लकडाउन मयायेगु क्वःछिउसां स्वनिगलय् मानवीय गतिविधि व वये-वने ज्याय् कडा यायेगु निर्णय याःगु खः । स्वनिगलय् कोरोना संक्रमिततय् ल्याः अप्वया वयेवं आः छु यायेगु धयागु रणनीति दयेकेत स्वंगू जिल्लाया सिडिओतय् बैठक जूगु खः ।

बैठकं सरकारी ज्याकुथिइ आवंलि ज्या म्हो याना यंकेगु व जिल्ला प्रशासन कार्यालयय् नं अत्यावश्यक सेवा बाहेक मेगु सेवा फुक्क बन्द यायेगु निर्णय यायेगु नं क्वःछिउगु खः ।