मिसा हिंसा विरुद्धया अभियानया झ्वलय् सहलह मुँज्या

येँ- अखिल नेपाल महिला संघ येँ मनपा १८ वडा कचाया ग्वसालय् मिसा हिंसा विरुद्धया झिंखुन्हुया अभियानया झ्वलय् छगू सहलह मुँज्या जुल । सहलह मुँज्याय् मूवक्ताकथं झायादीम्ह संघ येँ जिल्लाया सचिवनापं येँ जिल्ला समन्वय समितिया उपप्रमुख सरिता दाहाल, गोरखापत्र न्हिपौया पुलांम्ह प्रधान सम्पादक पुष्कर माथेमापिंसं थःथःगु विचाः प्वंकादीगु खः ।

संघया येँ जिल्लाया सचिव दाहालं मिसा हिंसा अप्व वनाच्वंगु व हिंसा पीडित जूसां नं सशक्त रुपं सः तये मफयाच्वंगु खँ धयादिल । मिसा हिंसाया घटनायात न्ह्यःने महल धाःसा न्याये प्राप्त जुइमखु धासें वय्कलं धयादिल, ‘थौंया इलय् मिसा हिंसा विरुद्ध जनचेतना तसकं हे आवश्यक । थज्याःगु ज्याझ्वःपाखें हे जनचेतना थनेत ग्वाहालि जुइ । उकिं जनचेतना थनेत संघं न्हापांनिसें हे मिसा हिंसा विरुद्धया अभियान निरन्तर रुपं न्ह्याका वयाच्वंगु दु ।’

मिसात धइपिं लिउने हे लानाच्वंगु खँ न्ह्यथनादिसें म्हाः, मफु, मसः धकाः लिकुना च्वनेगु मखसे आः मिसात नं न्ह्यःने न्ह्याः वनेमाःगु खँय् बः बियादिसें थःगु दक्षता अप्वयेकेत मदिक्क कुतः यानाच्वनेमाः धयादिल ।

गोरखापत्रया पुलांम्ह प्रधान सम्पादक माथेमां थौंया इलय् नं झीगु देशय् न्हिं खुम्ह मिसात बलात्कृत जुयाच्वंगु तथ्य न्ह्यब्वयादिसें झी थः हे म्ह्याय्मस्त नं गनं वनीबलय् इलय् मथ्यन धाःसा चिन्ता जुइ, थ्व तसकं भयावह अवस्था खः धयादिल ।
वय्कलं हिंसा छेँय् नं हे शुरु जुइगु व लँय् जक मखु ज्या यायेथाय् नं हिंसा जुयाच्वनी धासें मिसापिं कमजोर जुइगुलिं हे हेपे यायेगु, अज्याःपिंत हायेकेगु याइगु खः धयादिल ।

‘मिसातय्सं थःगु कमजोरी सुचुकीगुलिं हे इमित बोक्सी धकाः सास्ना बीगुलिसें अभद्र व्यवहार यायेगुजक मखसे बहुविवाह, अनमेल विवाह, क्वसः प्रथा आदिपाखें नं मिसातय्त मानसिक पीडा बियाः मिसा हिंसा यायेत स्वयाच्वनीगु खःसा थौंया इलय् साइबरपाखें नं मिसातय्त याइगु हिंसा अप्वया वनाच्वंगु दु’, वय्कलं धयादिल ।

‘मिसातय्त हेयया दृष्टिं स्वयेगु, पीडा बीगु, असमान व्यवहार यायेगु सभ्य नागरिकया बानी वा समाजया संस्कार मखु, थ्व मानवीय व्यवहार नं मखु’, वय्कलं धयादिल, ‘पीडाय् लानाच्वंपिं मिसातय्सं थःत जूगु पीडा, दुःख थःगु छेँजः व समाजय् इनेमाः । थज्याःगु व्यवहार हिलेत झीगु दृष्टिकोण नं हिइकेमाः ।’ ज्याझ्वलय् सहभागि मेमेपिंसं नं थःथःगु नुगःखँ तयादीगु खः ।