लुम्बिनीइ थ्वयेकल ‘जय श्रीराम’ या नारा
येँ (नेपालभाषा टाइम्स)÷लुम्बिनीइ म्हिगःनिसें शुरु जूगु मोरारी बापूया राम कथा वाचन ज्याझ्वलय् ब्वति काः वःपिं कार्यकर्तातय्सं लुम्बिनीइ हे ‘जय श्रीराम’ या नारा थ्वयेकूगु दु । राम कथा वाचनया विरोधय् म्हीग लुम्बिनीया परसा चोकय् जूगु बौद्धमार्गीतय् शान्तिपूर्ण प्रदर्शनय् उमिसं अप्पां कयेकूगु खःसा वयां लिपा सामान्य ल्वापु नं जूगु खः । वहे ल्वापुया झ्वलय् उमिसं ‘जय श्रीराम’ धकाः नारा थ्वयेकूगु खः । नारा थ्वयेकूपिं अप्वः यानाः हिन्दीभाषीत खः ।
थ्वहे झ्वलय् थ्व विवाद समाधान यायेगु झ्वलय् म्हिगः लुम्बिनी विकास कोषया ज्याकुथी च्वंगु थीथी पक्षया मुँज्यां मोरारी बापूया कथा वाचन ज्याझ्वः सञ्चालन याके बीगु सहमति याःगु दु । लुम्बिनी विकास कोष, कथा वाचन ज्याझ्वः विरुद्धया संयुक्त संघर्ष समिति, कथा वाचन ज्याझ्वःया ग्वसाः खलः व आदिवासी जनजाति महासंघया पदाधिकारीत च्वनाः याःगु उगु सहमतिइ बुद्ध धर्म व लुम्बिनी परिसरया छुं नं थासय् समस्या मवयेक मोरारी बापूया ज्याझ्वः सञ्चालन याके बीगु सहमति कायम याःगु खः । थुकिया लागिं माःगु व्यवस्थापन यायेगु जिम्मा नं लुम्बिनी विकास कोषं हे काःगु दु ।
अथे हे लुम्बिनी परिसर दुनेया अन्तर्राष्ट्रिय सम्मेलन केन्द्र सञ्चालन यायेगु बारे बुद्ध, धर्म, संघ व बौद्ध दर्शनय् प्रतिकुल लिच्वः मलाइकथं थीथी समुदायलिसे सहलह यानाः छगू कार्यविधि दयेकेगु जिम्मा नं लुम्बिनी विकास कोषयात बीगु सहमति अन जूगु दु ।
थ्वहे झ्वलय् राम कथा वाचन ज्याझ्वः सञ्चालन यायेत लुम्बिनी थ्यंकः वःम्ह मोरारी बापुं म्हिगः मायादेवी देगः, अशोक स्तम्भ व बुद्धयात म्वःल्हुकूगु पुष्करणी पुखूया दर्शन यानादिल । वय्कलं पुष्करणी खुसियात छ्यनं भागि यानादीगु खः । लिसें अन तयातःगु पाहां सफुतिइ नं हस्ताक्षर यानादिल ।
LEAVE YOUR COMMENTS