बुद्ध वाज बोर्न इन नेपालया मखु धम्मपद पाठया विश्व कीर्तिमान

येँ – बुद्धया धर्म वाक्यत मुनाः पिथनातःगु ग्रन्थ धम्मपदया गाथा पाठ यायेगु ज्याय् म्हिगः विश्व कीर्तिमान तयेगु ज्या जुल । म्हिगः तिंख्यलय् ७५ द्वः मनूत मुनाः धम्मपदया २५ गू गाथा पाठ यासें ‘दकलय् अप्वः मनूतय्सं छक्वलं धम्मपदया गाथा पाठ यायेगु’ कीर्तिमान तयेगु ज्या जूगु खः ।

थ्व कीर्तिमान गिनिज बुक अफ वल्र्ड रेकर्डय् नं दुथ्याकेगु ग्वसाः दुगुलिं म्हिगः तिंख्यलय् गिनिज बुकया प्रतिनिधित नं सःतातःगु खः । म्हिगःया ज्याझ्वः शुरुइ ‘बुद्ध वाज बोर्न इन नेपाल’ धकाः छक्वलं ७५ द्वः मनूतय्सं नारा थ्वयेकाः विश्व कीर्तिमान तयेगु धइगु ग्वसाः तयाः आयोजना याःगु खः । तर लिपा ज्याझ्वःयात कयाः विवाद पिहां वल ।

थौं ७५ द्वः मनूतय्सं ‘बुद्ध वाज बोर्न इन नेपाल’ धाः थें कन्हय् ७५ लाख मनूतय्सं ‘बुद्ध वाज बोर्न इन इण्डिया’ धयाबिल धाःसा उकियात नं गिनिज बुकं मान्यता बी मालीगु अवस्था वइ धइगु तर्क वयेवं ग्वसाः खलकं ज्याझ्वःयात हीकाः धम्मपदया गाथा पाठ यायेगु ज्याझ्वः दयेकूगु खः ।

धम्मपदया थ्व २५ गू गाथा ल्ययेगु व उकियात खस नेपाली भासं अनुवाद यायेगु ज्या भिक्षु ञाणपूर्णिक महास्थविरं यानाबिज्याःगु खः । ज्याझ्वः धम्मपद बारे खःसां तिंख्यलय् न्हापा हे तयार याना तःगु ‘बुद्ध वाज बोर्न इन नेपाल’ धइगु ब्यानर हे ब्वयेगु ज्या जूगुु खः ।