ने. सं. ११४४ कछलागा सप्तमी -

जात्रा न्यायेकेगु न्हूगु मापदण्ड

हानं लकडाउन बारे सरकारं बिचाः याःगु मदुनि

येँ (नेपालभाषा टाइम्स) – कोरोना संक्रमण धमाधम अप्वया वनाच्वंगु इलय् नं स्वनिगःया थीथी लागाय् जात्रा पर्व न्यायेकेगु ज्या जुयां तुं च्वंगु खँयात ध्यानय् तयाः सरकारं जात्रा पर्व न्यायेकेगु बारे स्वास्थ्य सम्बन्धी खँयात कयाः बिस्कं मापदण्ड तयार याःगु दु । थ्व मापदण्ड कथं जात्रा पर्व न्यायेकेगु ज्या याये हे मजिउगु मखुसां उकिया लागिं सतर्कता धाःसा कडा रुपं पालना यायेमाःगु खँ धयातःगु दु ।

जात्रा पर्व न्यायेकेबलय् पिने पिहां वनाः सुं मनूतय्त नापमलायेगु व नापलाय हे माःसा ६ फिटया दूरी कायम यानाः जक नापलायेमाःगु खँ नं धयातःगु दु । अथे हे मनू नापलायेबलय् थःगु हे छेँया जःपिं बाहेक मेपिं नापलाये मदइगु खँ नं धयातःगु दु । न्ह्यःने वयाच्वंगु जात्रापर्वय् जुइगु भिडभाडं यानाः ल्वय् न्यना वने फुगु खँयात ध्यानय् तयाः सरकारं थ्व मापदण्ड हःगु खः । नखःचखः, जात्रा पर्व न्यायेकेबलय् २५ म्ह स्वयां अप्वः मनू ममुनेत नं इनाप याःगु दु ।

अथे हे स्वनिगः दुने कोरोना संक्रमण जूपिं अप्वयावंसां थन हानं लकडाउन तयेगु बारे धाःसा सरकारं सोचे मयाःगु खँ धाःगु दु । आः लकडाउन तयेमाःसा स्थानीय निकायं हे थ्व ज्या याये फइगु खँ नं धाःगु दु ।

स्वास्थ्यसेवा प्रभावित जुइफु
स्वास्थ्य मन्त्रालयं राजधानी येँ लिसे देय्न्यंकं कोरोना भाइरस संक्रमण अप्वया वंगु धासें स्वास्थ्य सेवा प्रवाहलय् समस्या वये फइगु खँ धाःगु दु । म्हिगः नियमित प्रेस ब्रिफिङय् न्ववासें स्वास्थ्य मन्त्रालयया प्रवक्ता डा. जागेश्वर गौतमं उगु खँ धयादीगु खः ।

वय्कलं आः जनता स्वयम् हे जागृत जुयाः संक्रमण नियन्त्रणया निंतिं न्ह्यज्यायेमाःगु खँ धासें कोरोना संक्रमण अप्वया वनाच्वंगुलिं अस्पतालया बेड, स्वास्थ्य उपकरण व स्वास्थ्यकर्मीया अभाव जुइफगु सम्भावना दुगु खँ कनादिल । अथेजुयाः आः कोरोनाया वासः मलूतले भौतिक दूरी कायम यायेगु, मास्क तयेगु, सेनिटाइजर छ्यलेगु ज्या यायेत नं वय्कलं इनाप यानादिल ।

वय्कलं सावधानी मनालेगु खःसा संक्रमित अझ अप्वये फइगु व थज्याःगु अवस्था अस्पतालं फये मफइगु जुयाः इलय् होसियारी नालेत नं सर्वसाधारण जनतायात इनाप यानादिल । थुकिया लागिं आः सर्वसाधारण अतिकं हे सतर्क जुइत नं आह्वान यानादीगु दु ।