पीएल सिंहया अन्त्यस्टी थाैं लखतीर्थय्, येँ महानगरय् सार्वजनिक बिदा

येँ (नेपालभाषा टाइम्स)/ महानगरपालिकाया पुलांम्ह मेयर लिसें पुलांम्ह मन्त्री पीएल सिंह थौं सुथय् मंत । वय्कः ८५ दँ दुम्ह खः । पारिवारिक सूत्रं धाःकथं सुथय् (चान्हय्) १ बजे वय्कः मदुगु खः ।

छुं ई न्ह्यवंनिसें उसाँय् मदयाः वय्कः क्षेत्रपाटी चाक्सीबारीस्थित प्रकाशमान सिंहया छेँय् च्वंच्वनादीगु खःसा थौं सुथय् अन हे वय्कः मदुगु खः । दछि न्ह्यः आतापुतिया अपरेशन यानाःलि वय्कः चाक्सीबारीइ हे च्वनादीगु खः ।

मदुम्ह सिंहया अन्त्येष्टि थौं हे याइगु खँ धाःगु दु । सुथय् ११ बजे तक वय्कःया सीम्तहयात चाक्सीबारीइ तइ । वयां लिपा नेपाली कांग्रेसया केन्द्रीय कार्यालयय् अन्तिम श्रद्धाञ्जलीया लागिं यंकी । अन १ घन्टा ति तयाः अनं तुं शवयात्रा यानाः दिपय् यंकीगु ग्वसाः दु ।

वय्कःयात थनया लखुतीर्थय् च्वंगु दिपय् अन्तिम संस्कार याइगु ज्याझ्वः दु । अविवाहित सिंहयात वय्कःया किजा आईएल सिंहं मि तयादी ।
वि.सं. २०४९ या स्थानीय चुनावय् निर्वाचित जुयाःलि वय्कः येँ नगरपालिकाय् प्रजातन्त्र पुनस्र्थापना लिपाया न्हापांम्ह मेयर जुयादीगु खः । वय्कःया हे पालय् तत्कालीन येँ नगरपालिकायात ‘येँ महानगरपालिका’ घोषणा याःगु खः । अथे हे लिपा प्रतिनिधिसभाया चुनाव त्याकाः वय्कः शहरी विकास मन्त्री नं जुयादीगु खः ।

पुलांम्ह मेयर मदुगुलिं येँ महानगरपालिकां थाैं सार्वजनिक विदा बिउगु दु ।

पञ्चायतकाल व वयां लिपा नं ताःई तक वय्कलं सर्वोच्च नेता गणेशमान सिंहया सहयोगी जुयाः ज्या यानादीगु खः । देशय् गणतन्त्र पलिस्था जुइधुंकाः धाःसा वय्कः राजनीतिपाखें अलग्ग च्वनाः २०४७ सालया संविधान पुनस्र्थापना यायेमाः धकाः सक्रिय जुयादीगु खः ।