मस्तय् खोप कार्ड सुरक्षित तयादिसँ

छिं थः मस्तय्त खोप बी धुंकाः उकिया विवरण च्वयातःगु खोप कार्ड सुरक्षित तयादियागु दु कि मदु ? मदुसां आवंनिसें हे मालाः जतन यानाः तयादिसँ । छाय्धाःसा थ्व कार्ड स्कुल भर्ना यायेत निसें भविष्यय् मचा विदेश वनेत तकं आवश्यक दु । खोप कार्डया महत्व लिपा थ्यंक तसकं हे दु ।

बालस्वास्थ्य महाशाखाया प्रमुख डा. विकास लामिछानें यक्व मांपिंसं मस्तय् खोप कार्ड व उकिया महत्वबारे मथूगु खँ कनादी । वय्कलं धयादीगु दु, ‘यक्व हे म्हो मांपिंसं जक थः मचाया खोप कार्ड सुरक्षित यानातःगु दु ।’ मस्तय्त स्वास्थ्य संस्था वा खोप केन्द्रय् खोप बीके यंकेबलय् छक्वःपतिकं खोप कार्ड अनिवार्य रुपं यंकेमाः । थ्व हे कार्डया कारणं हे मचाः फुक्कं खोप काः कि मकाः धयागु लिपाथ्यंकं जानकारी कायेफइ ।

थज्याःगु महत्वपूर्ण भ्वँ जूसां थौंकन्हय् दुगु कार्ड सालुगु जूगुलिं गुनावनीगु, जतन यानातयेत थाकूगु जूगुलिं बालस्वास्थ्य महाशाखां वंगु आर्थिक दँ निसें प्लाष्टिकया कभर दुगु खोप कार्ड छ्यलेगु तयारी याःगु खः ।

वंगु साउन निसें प्लाष्टिकया कभर दुगु बाल स्वास्थ्य कार्ड नां बियातःगु थ्व कार्ड सिन्धुली जिल्लाय् नमूना कथं छ्यलेगु सुरु याःगु दु ।
सरकारं राष्ट्रिय खोप कार्यक्रममार्फत मस्तय्त ११ गू खोप निःशुल्क बिया वयाच्वंगु दु । तर नेपाःया सछिम्ह मध्ये झिम्ह मस्तय्सं छुं नं कथंया खोप काये मखनाच्वंगु दु । अथेहे ६६ हजार मस्तय्सं पूवंक खोप काये खनाच्वंगु मदु । सरकारं वइगु स्वदँ दुने कलेरा व टाइफाइडविरुद्ध नं खोप हयेगु तयारी यानाच्वंगु दु ।

सम्बन्धित बुखँ

LEAVE YOUR COMMENTS