तःभुखाय्या लुमंतिइ थौं थीथी ज्याझ्वः

येँ – ०७२ सालय् भुखाय् ब्वःगु थौं प्यदँय् क्यन । थ्व न्हियात लुमंकाः थौं थीथी थासय् थीथी ज्याझ्वः जुयाच्वंगु दु । थ्व झ्वलय् म्हिगः काष्ठमण्डप पुननिर्माण अभियानपाखें मरुइ छगू ज्याझ्वः यासें भुखाचय् मदुपिनि लुमंतिइ मैनमत च्याकेगु ज्या यात । अभियानपाखें भुखाचय् ध्वस्त जूगु मरुसतः जनस्तरं हे न्ह्याकेगु लागिं पहल यानाच्वंगु दु ।

उकथं हे भुखाचय् लानाः मदुपिनि लुमंतिइ थौं मरुइ हे छगू हिदान ज्याझ्वः नं याइगु जूगु दु । थौं सुथय् ९ बजेनिसें मरु सतःया दक्षिणपाखे मत च्याकेगु व हिदान ज्याझ्वः यायेत्यंगु खः । प्यदँ न्ह्यः मरु सतलय् हिदान हे जुयाच्वंगु इलय् भुखाय् ब्वयाः हिदानय् वयाच्वंपिं झिम्ह मनू सीगु खः । उकी हे मदुम्ह सानुमैंया कपालीया नामं नीस्वंगु सानुमैंया कपाली मेमोरियल फाउण्डेशनं थ्व ज्या याःगु खः।