कोरोनां सीपिं ६५ म्ह थ्यन

येँ (नेपालभाषा टाइम्स) – म्हिगः जक स्वनिगलय् ८७ म्ह कोरोना भाइरस संक्रमण पुष्टि जूपिं विरामीत लूगु दु। स्वास्थ्य तथा जनसंख्या मन्त्रालयया कथं येँय् ७६ म्ह , यलय् झिम्ह व ख्वपय् छम्हेसित कोरोना संक्रमण पुष्टि जूगु खः । म्हिगः जक देय्न्यंकं ३६० म्ह संक्रमित जूगु दुसा २३३ म्ह कोरोना मुक्त जुयाः छेँय् लिहां वंगु दु। म्हिगः तक कोरोना संक्रमण जुयाः सीपिनि ल्याः ६५ म्ह थ्यंगु दु ।

थ्वहे झ्वलय् कोरोना संक्रमण जुइधुंकाः नं च्याम्ह विरामीत स्वास्थ्यकर्मीया सम्पर्कय् मवयाच्वंगु खँ सीदुगु दु। म्हीग तक झिंखुम्ह संक्रमित सम्पर्कबिहीन जुयाच्वंगु खःसा म्हिगः च्याम्ह संक्रमित सम्पर्कय् वःगु खँ इपिडिमियोलोजी तथा रोग नियन्त्रण महाशाखा (इडीसीडीं) धाःगु दु। पिने जिल्लां येँय् वयाच्वंगु इलय् थानकोटय् स्वाब परीक्षण जूबलय् उपिं पोजिटिभ खने दुगु खः । तर पोजिटिभ खने दुसां उपिं स्वास्थ्यकर्मीया सम्पर्कय् धाःसा मवःगु खः ।

सम्पर्कबिहीन जूपिनिगु मोबाइल फोन अफ जुयाच्वंगु दुसा उपिं आपालं धइथें तराई जिल्लां वःपिं खः । संक्रमित जूपिं मनूत बिस्कं बिस्कं थासं वःपिं जूगु खँ नं अस्पतालं धाःगु दु ।

थ्वहे झ्वलय् देय्न्यंकं कोरोनां कयाः सीपिं मनूतय् ल्याः नं धमाधम थहां वनाच्वंगु दु। थ्व झ्वलय् म्हिगः हानं छम्ह मनू येँय् नं सीगु खँ धाःगु दु। थ्व नापं यानाः कोरोनां कयाः सीपिं मनूतय् ल्याः ६५ थ्यंगु खः । येँय् संक्रमण अप्वया वनेवं म्हिगःनिसें स्वनिगः दुने सवारी साधनय् जोरबिजोर प्रणाली लागू याःगु दुसा लिसें बहनी ९ बजेनिसें सुथय् ५ बजे तक लँय् न्यासि जुइगु नं बन्द याना बिउगु दु ।