डीआईजीं छथुं आईजी जुइन ज्ञवाली
येँ – नेपाल प्रहरीया न्हूम्ह महानिरीक्षक पदय् वर्तमान डीआईजी ठाकुर ज्ञवालीयात नियुक्त यायेगु तयारी जुयाच्वंगु खँ सीदुगु दु । वर्तमान महानिरीक्षक (आईजी) सर्वेन्द्र खनालं थ्वहे माघ २९ गते सेवा अवधिया कारणं अनिवार्य अवकाश कायेत्यंगु दु । वय्कःया नापनापं आः दुपिं स्वम्ह एआईजीपिं नं अनिवार्य अवकाशय् वनेत्यंगु दु । थुकिं यानाः डीआईजी ज्ञवालीयात एआईजी हे जुइ म्वायेक छथुं आईजी जुइगु अवसर चूलायेत्यंगु खः ।
वर्तमान आईजी खनालया नापनापं स्वम्ह एआईजी जक मखु आः दुपिं १८ म्ह डीआईजीतय्सं नं अनिवार्य अवकाश कायेत्यंगु दु । थुकिं यानाः न्हूम्ह आईजीया लागिं ठाकुर ज्ञवाली याकःचा हे जक दकलय् वरिष्ठ व उपयुक्त उम्मेदवार जुइगु खँ धाःगु दु ।
सरकारं थुकिया बारे छुं निर्णय धाःसा मयाःनि । तर छुं जुयाः सरकारं वय्कःयात आईजी दयेकल हे धाःसां वय्कःया कार्यकाल धाःसा मुक्कं न्याला जक जुइ । वयां लिपा वय्कलं नं सेवा अवधिया कारणं अनिवार्य अवकाश काये माली । न्याला जक प्रहरी प्रमुख जुइम्ह जूगुलिं सरकारं दथुइ हे मेगु निर्णय यायेफुगु अनुमान नं जुयाच्वंगु दु ।
सरकारं प्रहरी सेवाय् ३० वर्ष सेवा यानाः अवकाश काये मालीगु व्यवस्था हटे यायेगु कानून दयेकेधुंकूसां उकियात लागू धाःसा मयाःनि । यदि थ्व कानून लागू जुल धाःसा सर्वेन्द्र खनाल हे आईजी जुइ खनीगु खः । थ्व कानून लागू यायेवं क्वय्या तहलय् बढुवाया तःधंगु समस्या वइगु जूगुलिं सरकारं उकियात तत्काल कार्यान्वयन मयाःगु खँ धाःगु दु ।
LEAVE YOUR COMMENTS