मरुध्वाखाया कोरोना संक्रमित टेकुइ भर्ना, छेँ शिल

येँ (नेपालभाषा टाइम्स) – येँया मरुध्वाखाय् छम्हेसित कोरोना संक्रमणया आशंका यासें टेकु अस्पतालय् भर्ना याःगु दु। अनया वडा अध्यक्ष शशीलाल श्रेष्ठं कनादीकथं उम्ह मनूया रिपोर्ट धाःसा मवःनि ।

स्थानीय जनतां धाःसा मरुध्वाखाय् बालं च्वनीम्ह उम्ह मनूयात छुं न्हि न्ह्यः हे कोरोनाया लक्षण खने दयेधुंकूगु खःसां नं वयागु पीसीआर परीक्षण यायेगु खँय् धाःसा वेवास्ता याःगु द्वपं बिउगु दु । वडाध्यक्ष श्रेष्ठं धाःसा उगु छेँय् शिल यायेधुनागु खँ कनादीगु दु । छेँ शिल याःसां वहे छेँय् बालं च्वनीपिं मेपिं मनूत धाःसा न्हिथं पिहां वयेगु यानाच्वंगु खँ धाःगु दु। १२ कू क्वथा व टहरा समेत दुगु उगु छेँय् म्होतिं नं नीगू परिवार बालं च्वनाच्वंगु खँ धाःगु दु । आः उगु लागाय् पीसीआर परीक्षणया तयारी जुयाच्वंगु जानकारी वडाध्यक्ष श्रेष्ठं बियादीगु दु ।

थ्वहे झ्वलय् म्हिगः जक स्वनिगलय् ६२ म्हेसित कोरोना संक्रमण जूगु लूगु दु। थुकी येँय् जक ५७ म्ह व यलय् न्याम्हेसित संक्रमण पुष्टि जूगु खँ मन्त्रालयया प्रवक्ता डा. जागेश्वर गौतमं कनादीगु दु। मेखे कोरोना संक्रमणया कारणं म्हिगः जक नेपाःन्यंकं न्याम्ह मनू सीगु दु। म्हिगः पर्साय् निम्ह, मोरङय् निम्ह व येँय् छम्ह सीगु खः । पर्साय् १८ दँ दुम्ह मिसामचा व ४६ दँ दुम्ह मिजं सीगु खःसा मोरबय् निम्ह मिजंत सीगु खः । उकथं हे येँया बलम्बु च्वंगु सशस्त्र प्रहरी अस्पतालय् कोरोनां कयाः वासः याकेत हयातःम्ह सर्लाहीया ६५ दँ दुम्ह मिसा नं वासः यायेगु झ्वलय् सीगु खँ सीदुगु दु ।

सम्बन्धित बुखँ

LEAVE YOUR COMMENTS