‘केतकीय सिद्धान्त नालाकाःसां तिथिइ लिच्वः लाइमखु’
येँ (नेपालभाषा टाइम्स)÷ नेपाल पञ्चाङ निर्णायक विकास समितिया नायः डा. श्रीकृष्ण अधिकारीं वइगु बैशाख महिनानिसें सूर्य सिद्धान्तया थासय् केतकीय ग्रहगणीत सिद्धान्त लागू याःसां तिथिया सवालय् गोलमाल मजुइगु कथं हे पञ्चाङ निर्माण यायेगु जुइ धयादीगु दु । वय्कलं सिद्धान्त हिल धाःसा बरु गते उखथुखे लाइ, तिथि व तारिखयात लिच्वः लाइमखु धयादीगु दु । बुधवाः नेवाः सांस्कृतिक अभियन्तापिंलिसे पञ्चाङया ज्याकू नारांहिटीइ सहलह ब्याकेगु झ्वलय् समितिया नायः डा. अधिकारीं थ्व खँ धयादीगु खः ।
नेपाल पञ्चाङ निर्णायक समितिं वइगु बैशाखंनिसें लागू जुइकथं पञ्चाङया निंतिं सूर्य सिद्धान्तया थासय् केतकीय सिद्धान्त नालेत्यंगु दु । थज्याःगु अवस्थाय् नेपाल संवतया न्हूदँ ११४५ य् पिकाइगु पात्रोय् गते, तिथि, संस्कृतिइ तकं लिच्वः लायेफुगु न्ह्यथँसें पञ्चाङ समितिपाखें याकनं निर्णय यायेमाःगु माग तयाः डेलिगेशन वंगु खः ।
नेवाः देय् दबूया संरक्षक नरेश ताम्रकार, नेवाः देय् दबू स्वनिगः विशेष प्रदेश समितिया नायः श्रीकृष्ण महर्जन नेवाः, वरिष्ठ न्वकू नविन थेच्वमि, हलिं नेवाः गुथिया केन्द्रीय नायः विनोद महर्जन, नेवाः देय् दबू येँ जिल्ला समितिया नायः धनबहादुर महर्जन तिमिला, यल जिल्ला समितिया नायः रविन्द्र शाक्य, ख्वप जिल्ला समितिया नायः नरेश नेवाः, थीथी नेवाः खलः पुचःया प्रतिनिधि व ज्योतिषत सहित थ्यंमथ्यं नीन्याम्ह डेलिगेशनय् सहभागी जुयादीगु खः ।
समयसापेक्ष हिउपाः कथं सूर्य सिद्धान्तयात त्वःताः केतकीय सिद्धान्त नालेगु नितिं सरकारयात प्रस्ताव छ्वयातयागु खँ न्ह्यथनादिसें नेपाल पञ्चाङ निर्णायक विकास समितिया कार्यकारी निर्देशक सूर्यप्रसाद ढुंगेलं सरकारं निर्णय यायेवं केतकीय सिद्धान्त लागु जुइ धयादिल । उगु इलय् नेपाल संवतया न्हूदँया इलय् नं नेपाल पञ्चाङ निर्णायक विकास समितिपाखें आधिकारीक रुपं पात्रो पिकायेमाःगु व सरकारपाखें नं पिकायेके बीगुु नितिं नं भूमिका म्हितेमाःगु बारे नं सहलह जूगु खः ।
LEAVE YOUR COMMENTS