मोदी हाकनं नेपाः वइगु

थुगुसी लुम्बिनी दर्शन प्रमुख लक्ष्य

येँ – भारतीय प्रधानमन्त्री नरेन्द्र मोदीं हाकनं नेपाः भ्रमण यायेत्यंगु खँ सीदुगु दु । वय्कः थ्वहे वइगु असोज महिनाय् नेपाः भ्रमणय् वयेगु तयारी जुयाच्वंगु खँ सूत्रं धाःगु दु । वय्कःया थ्व न्याक्वःगु नेपाः भ्रमण खः । थ्व भ्रमण लिपा वय्कलं दकलय् अप्वः नेपाः भ्रमण यानादीम्ह भारतीय प्रधानमन्त्रीया कीर्तिमान नं कायम यानादी ।
वय्कःया नेपाः भ्रमणयात कयाः येँय् च्वंगु भारतीय दूतावास व परराष्ट्र मन्त्रालयं तयारी यानाच्वंगु खँ कुटनीतिक सूत्रं धाःगु दु ।

बिमस्टेक सम्मेलनया झ्वलय् भारतीय प्रधानमन्त्री मोदीयात नेपाःया प्रधानमन्त्री केपी ओलीं हाकनं भ्रमण यायेत ब्वनादीगु खः । मोदीया थुगु नेपाः भ्रमणया मू उद्देश्य बुद्ध जन्मभूमि लुम्बिनीया दर्शन खः धाःगु दु । वय्कःया न्हापा न्हापाया नेपाः भ्रमणया इलय् तःक्वःमछि कुतः यातं नं लुम्बिनी वने मफुगुलिं थुगुसी विशेष यानाः लुम्बिनी हे जक चाःहिलेगु लागिं वय्कः नेपाः झायेत्यंगु खँ धाःगु दु ।

थुगु भ्रमणयात कयाः परराष्ट्र मन्त्रालयया अधिकारी व भारतीय दूतावासया अधिकारी दथुइ सहलह जुयाच्वंगु दु । तर भ्रमणया एजेन्डा व तिथि बारे धाःसा निर्णय मजूनिगु खँ धाःगु दु । स्रोतया कथं मोदीया थुगु नेपाः भ्रमणया इलय् तुं भारतीय ग्वाहालिं दयेके ज्या क्वचाःगु जनकपुर– जयनगर रेलवे उलेज्या यायेगु तयारी नं जुयाच्वंगु दु । सरकारं थ्वहे वइगु पुस महिना दुने रेलवे सञ्चालन यायेगु तयारी यानाच्वंगु दु ।

सरकारं भारतीय डिब्बा ‘वेट लिज’ य् कयाः रेल सञ्चालनया तयारी यानाच्वंगु दु । भारतीय प्रम मोदीया थुगु भ्रमणया मू आज्जु लुम्बिनी जक हे जूगु खँ धाःगु दु । वय्कःया लुम्बिनी वनेगु न्हापाया कुतः गबलें ई व गबलें सुरक्षाया कारणं सम्भव मजूगु खः ।

नेपाःया परराष्ट्र मन्त्रालयं थुगु भ्रमणया तिथि व एजेन्डा क्वःमछिउनि धाःसां भारतीय सञ्चार माध्यमं धाःसा मोदी थ्वहे वइगु मंसिर १३ व १४ गते नेपाः भ्रमणय् वनीगु धकाः च्वया हयेधुंकूगु दु । थ्व भ्रमणय् निगू देय् दथुइ जुया वयाच्वंगु उच्चस्तरीय सहलहयात नं निरन्तरता बीगु खँ नं भारतीय सञ्चार माध्यमतय्सं धाःगु दु ।