ने. सं. ११४४ ञलाथ्व दशमी -

हानं लकडाउन तयेगु बारे बिचाः, थौं वालुवाटारय् प्रधानमन्त्रीपाखें विज्ञतलिसे सहलह

येँ (नेपालभाषा टाइम्स) – थीथी जिल्लाय् कारोना संक्रमण अप्वया वनेवं सरकारं हाकनं ‘लकडाउन’ यायेगु बारे सहलह न्ह्याकूगु दु। विज्ञतय्सं लकडाउन वा मेगु विकल्प ममाल धाःसा भयावह स्थिति वयेफइगु ख्याच्वः बियाहःगुलिं सरकारं लकडाउन बारे सहलह न्ह्याकूगु खः । थुकिया निंतिं प्रधानमन्त्री केपी ओलीं थौं नीम्ह स्वयां अप्वः जनस्वास्थ्यविद्तय्त बालुवाटारय् सःताः सहलह यायेत्यंगु खः । प्रम ओलीं संक्रमितया ल्याः अप्वया वनेवं थप रणनीति दयेकेगु निंतिं विज्ञपिनिगु सल्लाह कायेत्यंगु खँ प्रधानमन्त्रीया प्रेस सल्लाहकार सूर्य थापां कनादीगु दु। वय्कःया कथं संक्रमितया ल्याः अप्वया वनेवं प्रमं विज्ञपिनिगु सल्लाह कायेगु तयारी याःगु खः ।

संक्रमण पनेगु निंतिं सरकारं न्हूगु रणनीति दयेकेगु तयारी यानाच्वंगु खँ नं सल्लाहकार थापां कनादीगु दु। थुकिया निंतिं वय्कलं लकडाउन यायेगु बारे सल्लाह बियाच्वंपिं विज्ञतलिसे सहलह यानादीत्यंगु खः । थौंया बैठकय् प्रधानमन्त्रीं स्वास्थ्यविद्तलिसे नेपालय् समुदाय स्तरीय संक्रमण जू मजू बार नं सहलह याइगु खँ धाःगु दु। सरकारं आः तक समुदायस्तरीय संक्रमण मजूगु धायेगु याना वयाच्वंगु खःसां नं स्वास्थ्यविज्ञपिंसं धाःसा नेपालय् समुदायस्तरय् संक्रमण खने दयेधुंकूगु संकेत वःगु खँ धायेगु यानाच्वंगु दु ।

लिपांगु इलय् प्रदेश २ या वीरगञ्ज, धनुषालिसे स्वनिगलय् कोरोना भाइरसया संक्रमण अप्वया वनेवं प्रधानमन्त्रीं विज्ञपिं लिसे सहलह यायेत्यंगु खः । स्वास्थ्य विज्ञपिंसं ट्राभल हिस्ट्री मदुपिंत नं संक्रमण खनेदुगुलिं महामारी भयावह रुप काये फइगु ख्याच्वः बिया वयाच्वंगु दु। थ्वहे झ्वलय् स्वास्थ्य मन्त्रालयं मस्त व जेष्ठ नागरिकयात छेँय् नं पिहां मवयेत इनाप याःगु दु। झिंनिदँ क्वय्या मस्त व खुइदँ दुपिंत छेँनं पिहां मवयेत मन्त्रालयं इनाप याःगु खः ।

सरकारं वंगु चैत १० गते लकडाउन याःगु खःसा साउन ६ गते लिपा लकडाउन चीकूगु खः । तर लकडाउन चीके धुनेवं तराई लिसे स्वनिगलय्सं क्रमण अप्वया वनेवं हाकनं लकडाउन यायेमालीगु अवस्था वःगु धासें स्वास्थ्यविज्ञलिसे सहलह न्ह्याकेत्यंगु खः । नेपालय् कोरोना भाइरस संक्रमणया ल्याः नीद्वः स्वयां अप्वः दयेधुंकूगु दुसा ५७ म्ह सीधुंकूगु दु ।

मास्क व भौतिक दूरी अनिवार्य
येँ (नेपालभाषा टाइम्स) -विश्व स्वास्थ्य संगठन नेपाःया प्रतिनिधि जोस भान्डे लरं कोरोना भाइरस संक्रमणया जोखिम म्हो यायेत अनिवार्य रुपं भौतिक दूरी कायम यायेत इनाप यानादीगु दु । लिपांगु इलय् सरकारं लकडाउन चीकेधुंकाः मनूतय् व्यवहारय् हिउपाः मवःगुलिं संक्रमण अप्वया वनाच्वंगु धासें वय्कलं उगु इनाप यानादीगु खः । वय्कलं भौतिक दूरी कायम यायेगु खःसा संक्रमण म्हो याये फइ धासें धयादी, ‘झीसं भौतिक दूरी कायम यायेगु खःसा लकडाउन म्हो यायेत, समुदाय कोरोना भाइरस न्यंके मबीत तःधंगु भूमिका म्हितेफइ ।’ लिसें वय्कलं अनिवार्य रुपं माक्स छ्यलेत नं इनाप यानादीगु दु ।