सगरमाथा गइपिं नेपाः स्वयां चीनपाखे आकर्षित !

येँ – विश्वय् हे नेपाःया छगू आकर्षणया केन्द्र जुयाच्वंगु सगरमाथा आरोहण याइपिं आरोहीत आः नेपाःपाखें स्वयां नं चीनपाखें आरोहण यायेत स्वयाच्वंगु दु । भारतं पिहां वइगु अंग्रेजी न्हिपौ ‘द टाइम्स अफ इण्डिया’या अनलाइन संस्करणया छगू समाचारय् थ्व खँ धयातःगु दु ।
समाचारय् धयातः कथं सगरमाथा आरोहण सम्बन्धी नेपाःया नीति बांलाः मजूगुया नापनापं सगरमाथा गइपिंत ग्वाहालि याइगु पुचःतय्सं नं तसकं दंक ज्या याना बीगु कारणं अनुभवहीन आरोहीतय्सं यानाः नेपाःपाखेया आरोहण तसकं जोखिम जूगु जुयाः विदेशी आरोहीतय्सं नेपाः जुयाः सगरमाथा मगयेगु निर्णय याना हःगु खः ।

नेपालं आः नकतिनि अपांगता दुपिंत सगरमाथा गयेकेगु मखु धकाः याःगु निर्णयया कारणं नं विश्वन्यंकंया आरोहीत तम्वयाच्वंगु खँ समाचारय् धयातःगु दु । छखे नेपाःया नीतिया कारणं यानाः हे विदेशी आरोहीत चीनया लँपु जुयाः सगरमाथा गयेत उत्साहित जुयाच्वंगु दुसा मेखे चीनं नं विदेशी आरोहीतय्त थःपाखे आकर्षित यायेत थीथी कथंया योजनात हयाच्वंगु खँ नं समाचारय् धयातःगु दु । चीनया लँपुं सगरमाथा गयेगु खःसा ल्हासा जुयाः वनेमाः । न्हापा चीनं ल्हासाय् विदेशीतय्त दुकायेगु बन्द याना तःगुलिं विदेशीत बाध्य जुयाः हे नेपाःपाखें सगरमाथा गये मालाच्वंगु खः ।

तर थौंकन्हय् चीनं ल्हासायात नं विदेशीतय् लागिं खुल्ला याना बीधुंकूगु दु । उलि जक मखु ल्हासा जुयाः सगरमाथा गइपिनि लागिं थीथी कथंया सुविधा नं बीगु तयारी यानाच्वंगु दु । चीनं ल्हासाया लँपुपाखें सगरमाथाया च्वकाय् तक दँय्दसं हे लँ दयेका बीगु घोषणा यायेधुंकूगु दु । लिसें ल्हासां लिसें सगरमाथा लागाय् हेलिकप्टर ब्वयेकेगु तयारी नं यानाच्वंगु दु । न्हापा नेपाःपाखें जक हेलिकप्टर सुविधा दुगु खः । सगरमाथा आरोहण नेपाःया लागिं छगू तःधंगु आर्थिक आय जुइगु श्रोत नं जुयाच्वंगु दु । छुं जुयाः सगरमाथा गइपिं चीनपाखे आकर्षित जू वन धाःसा नेपाःयात तःधंगु घाटा जुइगु खँ नं समाचारय् धयातःगु दु ।