असं दबूया पुलांगु पसः नं चीकल
येँ (नेपालभाषा टाइम्स)÷सम्पदाय् तयातःगु पसःत चीकेगु झ्वलय् येँ महा– महानगरपालिकां म्हिगः ऐतिहासिक असं दबुलिइ तयातःगु पुलांगु पसः नं चीका छ्वःगु दु ।
असंया हे स्थानीय मनूतय्सं थ्व दबुलिइ पुजाज्वलं सम्बन्धी पसः तया तःगु खः । थ्व छगू दबुलिइ जक न्हय्गू पसः दुगु खः ।
स्थानीय मनूतय्सं धाः कथं अन न्हापा न्हापा ध्यबा हिलीगु पसः दुगु खः । लिपा ब्याट्री, लाइटर आदि पसः तल । आः पुजाज्वलं सम्बन्धी पसः तयातःगु खः । थ्व दबुलिइ पसः तयेगु शुरु जूगु ७० दँ स्वयां नं यक्व दयेधुंकल जुइमाः धइगु स्थानीय यज्ञरत्न तुलाधरया अनुमान दु ।
अन पसः तयातःपिं व्यवसायीतय्सं गुथि संस्थानयात पसःया बाः नं पुला तःगु दु । येँ मनपां छुं ई न्ह्यः हे अन वयाः पसः चीकि धाःवःगु खःसा व्यवसायीतय्सं थःपिंसं गुथि संस्थानयात बाः पुला तयागु दु धकाः भ्वं क्यंगु खः । मनपां उगु भ्वंया बारे अध्ययन यायेगु जुइ धकाः धाःगु खःसां म्हिगः धाःसा छक्वलं २० म्ह ति नगर प्रहरी वयाः पसःया च्वय् तयातःगु जस्ता पिकयाः पसः समेत चीका छ्वःगु खः ।
मनपां आः बालकुमारी द्यःया न्ह्यःने द्यःछेँय् तयातःगु पसः नं चीकि धकाः धाः वयेधुंकूगु खँ सीदुगु दु । येँया आपालं थासय् द्यःछेँय् पसः बालं बियाः तयातःगु दु ।
मनपापाखें थ्व स्वयां न्ह्यः जनबहाः पिने नौ देगलय् तयातःगु पुलांगु चायागु थलबल पसः नं चीका छ्वःगु खः । मोहनिया इलय् उगु पसलय् चायागु भ्यगः आदि न्याये–मीगु ज्या जुइगु खः । मनपां नगरन्यंकं हे मोहनि न्ह्यः लाकाः बँपसः लिसें सम्पदाय् तयातःगु पसःत चीकेगु अभियान न्ह्याकाच्वंगु दु ।
LEAVE YOUR COMMENTS