अःखतं न्यासि वंपिंत लाठी

येँ – लोकसेवा आयोगं पिकाःगु स्थानीय तहया कर्मचारी भर्ना सम्बन्धी विज्ञापनया विरोधय् आरक्षण बचाउ अभियानं म्हिगः येँया माइतीघर मण्डलां न्ह्याकूगु प्रदर्शनय् प्रहरीं लाठिचार्ज याःगु दु । माइतीघर मण्डलां अःखतं न्यासि वनाः बानेश्वर थ्यंगु इलय् प्रहरीं प्रदर्शनकारीयात हस्तक्षेप याःगु खःसा वयां लिपा निगू पुचः दथुइ ल्वापु जूगु खः ।

प्रदर्शन नियन्त्रण यायेत प्रहरीं लाठी प्रहार याःगु खः । उकी लानाः प्रदर्शनकारी राजकुमार थापा मगर घाःपाः जूगु दु । मगरया छ्यनय् घाः लाःगु दु । थ्व स्वयां न्ह्यः म्हीग नं आरक्षण बचाउ अभियानं येँया भृकुटी मण्डपं जुलुस पिकाःगु खःसा उगु जुलुसयात नं प्रहरीं हस्तक्षेप याःगु खः ।

आयोगं जेठ १५ गते स्थानीय तहया निंतिं थीथी सेवा व समूहया प्राविधिक व अप्राविधिक यानाः ९१६१ म्ह खुला प्रतिस्पर्धापाखें पदपूर्तिया विज्ञापन याःगु खः । उगु विज्ञापन संविधान, कानून व सामाजिक न्यायया सिद्धान्त अःखः जूगु धासें आरक्षण बचाउ अभियानया नेतृत्वय् आदिवासी जनजाति, दलित, मुस्लिम, अल्पसंख्यक, मिसा लिसें अपाङता दुपिंसं मंकाः कथं प्रदर्शन याना वयाच्वंगु खः ।