यातायातय् जोरबिजोर लागू यायेत सुझाव

येँ (नेपालभाषा टाइम्स) – स्वनिगलय् संक्रमण अप्वयेवं स्वास्थ्य तथा जनसंख्या मन्त्रालयं निजी तथा सार्वजनिक सवारी साधनय् जोरविजोर प्रणाली लागू यायेत प्रस्ताव याःगु दु ।

वंगु असार २६ गतेनिसें निजी सवारी साधनय् जोरविजोर प्रणाली चीकूगु खःसा सार्वजनिक यातायात नं चले याके बिउगु खः । तर लकडाउन चीकेवं स्वनिगलय् कोरोना संक्रमण अप्वया वनेवं हानं जोरविजोर प्रणाली नालेत सिफारिस याःगु खः। स्वास्थ्य मन्त्रालयं सवारी साधनय्जो रविजोर लागू यायेगु पिनें वइपिंत १४ न्हि अनिवार्य होम वा स्थानीय क्वारेन्टाइनय् तयेमाःगु सुझाव बिउगु दु ।

स्वनिगलय् दुहां वइपिं अप्वया वनाच्वंगु लिसें सार्वजनिक यातायात चले याइपिं मजदुरतय्के नं संक्रमण खनेदयेवं मन्त्रालयं जोरविजोर प्रणाली लागू यायेमाःगु खँय् बः बिउगु खः । मन्त्रालयं याःगु प्रस्तावयात कयाः सरकार सकारात्मक जूगु खँ सीदुगु दु । मन्त्रालयया प्रस्तावयात कोरोना नियन्त्रण समितिं मन्त्रिपरिषद्या बैठकय् छ्वयेगु तयारी यानाच्वंगु दु। मन्त्रिपरिषदं पारित यात धाःसा जोरविजोर प्रणाली लागू जुइगु खँ धाःगु दु ।